ЦХИНВАЛ, 20 дек – Sputnik, Козаты Диана. Хуссар Ирыстоны дыккаг бон полигон "Дзарцъем"-ы районы судзы кӕрдӕг. Зынгсирвӕзт райдыдта цыппӕрӕмы райсомӕй.
Республикӕйы Уӕлвӕткон уавӕрты министрады (УУМ) фехъусын кодтой, зынгсирвӕзт кӕй ӕрцыд ӕфсӕддон полигоны территорийыл – хуссарирыстойнаг ирвӕзынгӕнджытӕн уырдӕм бацӕуыны бар нӕй. Афтӕ ма судзы хӕххон хъӕдджын бынат, ӕмӕ уырдӕм сӕрмагонд техникӕйӕн фадат нӕй бацӕуын. Уагдоны банысан кодтой, зынгфӕдисонтӕ цыппӕрӕмӕй фӕстӕмӕ къухӕй кӕй хуыссын кӕнынц арт, цӕмӕй ма аххӕсса полигоны территорийӕ.
"Мах нӕ цӕст дарӕм уавӕрмӕ", - загътой УУМ.
Хуссар Ирыстоны Хъахъхъӕнынады министрады пресс-службӕйы банысан кодтой, кӕрдӕг кӕй судзы территорийыл, кӕцы хауы 4-ӕм уӕрӕсейаг ӕфсӕддон базӕмӕ.
Уӕрӕсейаг базӕйы минӕвар та фидарӕй загъта, ӕфсӕддон полигоны территори, кӕцыйыл ӕрцыд зынгсирвӕзт, ис хуссарирыстойнаг хъахъхъӕнынадон уагдоны бӕрны.
"Нӕ информацимӕ гӕсгӕ, зынгсирвӕзт хуыссын кодтой полигоны командӕйы зынгфӕдисон къордтӕ", - банысан кодтой базӕйы.
Зынгсирвӕзты фӕзуат бӕрӕг нӕу.