ЦХИНВАЛ, 2 мар - Sputnik. Уӕгъдибар хъӕбысӕйхӕцӕг Хуссар Ирыстонӕй Плиты Вадим рамбылдта бронзӕйон майдан Цӕгат Кавказы федералон зылды фыццагады. Ерыстӕ ацыдысты дагестайнаг Хасавюрты, хъусын кӕны РХИ фӕсивӕдон политикӕ, спорт ӕмӕ туризмы комитеты пресс-службӕ.
Ерысты хайад истой Цӕгат Кавказы хуыздӕр спортсментӕ 16 азы кары онг. Хуссар Ирыстоны хъӕбысхӕсты скъолайы хъомылгӕнинаг архайдта 52 килограммы уӕзы категорийы.
"Вадим ауагъта 4 тохы, кӕцыты рамбылдта ӕртӕ хатт. Бронзӕйон майданыл тохы Плиты Вадим фӕуӕлахиз Дагестаны минӕварыл", - радзырдта спортсмены тренер Коцты Тамерлан.
Ерысты фӕстиуджытӕм гӕсгӕ Плиты Вадим схызт кады пьедесталмӕ ӕмӕ райста балцӕг Уӕрӕсейы фыццагадмӕ.