ЦХИНВАЛ, 25 мар – Sputnik, Козаты Диана. Стыр Фыдыбæстæйон хæсты ветерантæ, кæцытæ цæрынц Хуссар Ирыстоны, Уæлахизы 75-азон юбилеймæ райсдзысты фæйнæ 75 мин сомы, загъта президент Бибылты Анатолий.
Ацы аз республикæйы банысан кæндзысты Стыр Уæлахизы юбилей. Хуссар Ирыстоны абоны бон цæрынц 13 ветераны.
"Стыр Фыдыбæстæйон хæсты ветерантæн бафиддзысты фæйнæ 75 мин сомы. Фæсфронты фæллойгæнджытæ та райсдзысты фæйнæ 50 мин сомы", - загъта президент.
Раздæр Уæрæсейы президент Владимир Путин бафыста барамынд ветерантæн иурæстæгон фиддонты фæдыл, кæцыты бæрц уыдзæн 75 æмæ 50 мин сомы. Фиддонтæ ратдзысты Стыр Уæлахизы 75-азон юбилейы цытæн.
Ахæм скъуыддзаг ма райста Цæгат ирыстоны разамынад дæр.