ЦХИНВАЛ, 8 апр – Sputnik, Плиты Фатимæ. Хуссар Ирыстоны Дзауы районы рынчындон рацарæзтой карантинон объектмæ коронавирусæй бахизыны нысанæн. Медицинон уагдон райсдзæн, карантины цы адæм ис, уыдоны, фехъусын кодта Sputnik рынчындоны сæйраг дохтыр Гасситы Константин.
"Ныридæгæн пациентты иууылдæр афыстам, уыдон медицинон æххуыс исынц хæдзæртты. Ам уыдзæн карантинон зонæ. Куыддæр дзы зæрдæхсайгæ адæм фæзына, афтæ уыдон æрвыст цæудзысты РБМЦ инфекцион хайадмæ", - загъта Гасситы Константин.
Медуагдонæн йæ бон уыдзæн райсын 30 адæймаджы - карантины уæвджытæн бацæттæ кодтой 16 палатæйы.
"Рынчындон нымад у 15 адæймагыл, ноджы ма уый бæрц бынæттæ та бацæттæ кодтам уæлæмхасæй. Уым карантины адæммæ сæ цæст дардзæн медперсонал, бон дыууæ хатты сын арæзт цæудзæн термометри", - бафтыдта уый.
Гасситы Константины ныхæстæм гæсгæ, уыдон цæттæ сты куыстмæ, æрмæст проблемæтæ гæнæн ис æмæ фæзыной рынчындоны къæбицы хæлцадæй ифтонг кæныны хъуыддаджы.