Ирон изӕр Къостайы скверы: куыд сарӕзта Цхинвалы фӕсивӕд "Ирон хъазт"

Цхинвалы инициативон фӕсивӕд ивгъуыд изӕр сорганизаци кодта националон кӕфтытӕ ӕмӕ зарджыты изӕр
Sputnik

ЦХИНВАЛ, 28 июл - Sputnik, Хъуылымбегты Зӕлинӕ. Массон кафт симд, афтӕ ма авторон ӕмӕ адӕмон зарджытӕ сӕххӕст кодтой Цхинвалы фӕсивӕд, кӕцытӕ ӕрӕмбырд сты Къостайы скверы ивгъуыд изӕр.

Ирон изӕр Къостайы скверы: куыд сарӕзта Цхинвалы фӕсивӕд "Ирон хъазт"

Фӕстаг рӕстӕджы фӕсивӕды хсӕн популярон ссис "Ирон хъазт", цы ран ӕвзонг цхинвайлӕгтӕ ӕвдисынц кафын ӕмӕ ирон музыкалон инструменттыл цӕгъдыны куырдиат.

Ивгъуыд изӕр райдыдта зарӕггӕнджытӕ Кокойты Анна ӕмӕ Хъодалаты Марияйы зарджытӕй. Уый фӕстӕ Гаглойты Алан цагъта дала-фӕндырыл ӕмӕ ӕххӕст кодта адӕмон зарджытӕ. Кӕсджыты зӕрдӕ балхӕдта йӕ ралӕудӕй музыкант Гуыцмӕзты Инна дӕр.

Ирон изӕр Къостайы скверы: куыд сарӕзта Цхинвалы фӕсивӕд "Ирон хъазт"

Националон изӕр ауадзыны хъуыды фӕзынд ХИПУ-йы студентон советы сӕрдар Кокойты Анна ӕмӕ зарӕггӕнӕг Хъодалаты Мариямӕ. Кокойты Аннайы ныхӕстӕм гӕсгӕ, мадзал сорганизаци кӕнынӕн сын баххуыс кодта Хуссар Ирыстоны паддзахадон университеты къухдариуӕгад.

Ирон изӕр Къостайы скверы: куыд сарӕзта Цхинвалы фӕсивӕд "Ирон хъазт"

"Махмӕ рагӕй уыд ацы хъуыды. Мах уыдтам, куыд уадзынц ахӕм изӕртӕ Цӕгат Ирыстоны, ӕмӕ аскъуыддзаг кодтам бафӕлварын. Уый фӕстӕ бадзырдтам Гаглойты Аланмӕ, кӕцы иттӕг хорз цӕгъды националон инструменттыл – уый хорзыл банымадта нӕ хъӕппӕрис. Хайадисджытӕ иууылдӕр цыбыр ӕмгъуыдмӕ бацӕттӕ кодтой сӕхи изӕрмӕ. Зарджытӕ иууылдӕр ӕххӕст кодтам ирон ӕвзагыл", - загъта Кокойты Анна.

Йӕ ныхӕстӕм гӕсгӕ, ӕнхъӕл нӕ уыдысты, "Ирон хъазт" афтӕ тынг кӕй фӕӕцӕудзӕн фӕсивӕды зӕрдӕмӕ.

"Махмӕ ахӕм хъуыды дӕр уыд, фӕсивӕды зӕрдӕмӕ кӕй нӕ фӕцӕудзӕн, ӕмӕ сӕ нӕ бафӕнддзӕн хайад райсын, фӕлӕ уыдон тынг зӕрдиагӕй ӕрбаиу сты кӕфтытӕм. Знонӕй фӕстӕмӕ нӕм дзурынц, цӕмӕй ахӕм мадзӕлттӕ арӕхдӕр уадзӕм", - бафтыдта Кокойты Анна.

"Ирон хъазт" ногӕй кӕд ауадздзысты, уый нырма бӕрӕг нӕу, фӕлӕ организатортӕ дзырд радтой, Цхинвалы фӕсивӕд уый тыххӕй фыццаг кӕй базондзӕн.