ЦХИНВАЛ, 31 мар — Sputnik. Хуссар Иры МХМ экономикон æдасдзинады управленийы кусджытæ ссардтой Цхинвалы дуканитæй иуы 150 авджы тобæгонд энергетикон нозт, хъусын кæны республикæйы уагдоны пресс-службæ.
Энергетиктæ æнæзакононæй уæй кæныны хъуыддаг рабæрæг мидхъуыддæгты министрады дæлхайæдты иумæйаг рейдты рæстæджы.
"Басгæрсты рæстæджы дуканитæй иуы ссардæуыд тобæгонд энергетиктæ. Оперативон кусджытæ куыд рабæрæг кодтой, афтæмæй тобæгонд продукци реализаци кодта дуканийы уæйгæнæг", - дзырдæуы хъусинаджы.
Барадхъахъхъæнæг уагдоны банысан кодтой, фæткхалæгмæ кæй æнхъæлмæ кæсы 2-йæ 5 мин сомы онг ивар. Сылгоймаджы ныхмæ административон æрмæг æрвыст æрцыд Цхинвалы горæттаг тæрхондонмæ.