ЦХИНВАЛ, 3 сен - Sputnik. Беслӕны уагъд цӕуынц фыццӕгӕм скъолайы теракты 17-ӕм афӕдзы бонӕн нывонд мадзӕлттӕ. Ӕвирхъау трагедийы амӕттӕгты рухс нӕмттӕ ссардтой Хуссар Ирыстоны президент Бибылты Анатолий, РЦИ-Аланийы сӕргълӕууӕджы хӕстӕ ӕххӕстгӕнӕг Сергей Меняйло, цӕгатирыстойнаг хицауады уӕнгтӕ ӕмӕ депутаттӕ, ӕхсӕнадон организациты минӕвӕрттӕ.
Хуссар Иры президент хайад исы фыдохы мадзӕлтты Беслӕны
© Пресс-служба главы и правительства РСО-А
Цӕгат Ирыстоны сӕргълӕууӕг ӕмӕ хицауады пресс-службӕ куыд хъусын кӕны, афтӕмӕй фыдохы ӕртыккаг бон райдыдта панихидӕйӕ.
"Райсомӕй скъолайы спортзалы сӕххӕст кодтой Хуыцаумӕ скуывд. 13.05 сахатыл скъолайы кӕртӕ райхъуыст дзӕнгӕрӕджы дыууӕ цӕфы – уыцы рӕстӕг 17 азы размӕ ацы ран айхъуыстысты дыууӕ срӕмыгъды", - дзырдӕуы хъусинаджы.
Фыдохы мадзӕлттӕ хайадисджытӕ бацыдысты мемориалон комплекс "Город ангелов"-мӕ, сӕвӕрдтой дидинтӕ "Дерево скорби" монументмӕ ӕмӕ ФӔС сӕрмагонд дӕлхайӕдтӕ "Альфа" ӕмӕ "Вымпел"-ы ӕфсӕддонты цыртмӕ.
Иу уысм ӕдзӕмӕй алӕугӕйы фӕстӕ уӕларвмӕ суагътой 334 урс тымбылӕджы – уый у теракты амӕттӕгты нымӕц.
Фыдохы мадзӕлттӕ балхынцъ уыдзысты абон изӕры, Беслӕны скъолайы кӕрты 20.00 сахатыл ссудздзысты цырӕгътӕ фӕмардуӕвджыты мысӕнӕн.
2004 азы 1 сентябры беслӕйнаг скъолайы спортивон залы ӕртӕ боны террористтӕ дардтой амынӕты 1128 адӕймаджы. 3 сентябры 13.05 сахатыл скъолайы спортивон залы фехъуыст фыццаг бомбӕйы фехӕлд. Фӕмард 334 адӕймаджы, се хсӕн 186 сывӕллоны, 800 адӕймагӕй фылдӕр та фӕцӕф сты.