ЦХИНВАЛ, 16 сен – Sputnik, Гӕбӕраты Элина. Цхинвалы Фидауынгӕнджыты уынгыл бавнӕлдтой асфальт ӕвӕрынмӕ. Горӕты администрацийы куыд радзырдтой Sputnik, афтӕмӕй куыстыты бӕрцуат егъау нӕу, кӕртыты хӕрзарӕзтад фӕуыдзӕн иу къуыримӕ.
Цхинвалы Фидауынгӕнджыты уынджы кӕртыты цалцӕг
© Sputnik / Элина Габараева
Ацы ран цалцӕггӕнӕн куыстытӕ уагъд цӕуынц сӕрды райдайӕнӕй. Уый размӕ уалдзӕджы раивтой зӕххы бын инженерон хызӕгтӕ.
"Ивгъуыд къуыри кусджытӕ цӕттӕ кодтой 2, 12 ӕмӕ 14 хӕдзӕрты кӕртытӕ асфальт ӕвӕрынмӕ, ӕмӕ абон уыдон бавнӕлдтой куыстмӕ", - загътой горӕты администрацийы.
Объектыл архайынц 15 кусӕджы ӕмӕ техникӕйы фондз иуӕджы.
Фарон коммуналон кусджытӕ сцалцӕг кодтой Гафезы уынджы кӕртытӕ ӕмӕ Фидауынгӕнджыты уынджы кӕртыты хай, афтӕ ма Джиоты Аланы проспектыл кӕртытӕ дӕр. Столицӕйы администрацийы 2021 азы нывӕзты ма ис Нӕузӕххонты уынджы кӕртыты хӕрзарӕзтад, 2022 азы – микрорайон БАМ-ы, 2023 азы та Тӕболты Сергей ӕмӕ Хъайтарты уынгтыл.