ЦХИНВАЛ, 22 сен – Sputnik, Плиты Фатимӕ. Хуссар Ирыстоны фӕфылдӕр кӕндзысты аходӕны хӕрдзтӕ хистӕркъласонтӕн, уый тыххӕй фехъусын кодтой Sputnik ахуырады министрады пресс-службӕйы.
Хуссары Ирыстоны скъолаты ӕмӕ скъола-интернатты ахуырдзауты аходӕнтӕн хицауад хицӕн кӕны ӕхцайы фӕрӕзтӕ.
"Скъола-интернатты цы сывӕллӕтты ахуыр кӕнынц, уыдонӕн хицӕн цӕуы 190,60 сомы, уыдон фылдӕр рӕстӕг сты ахуырадон уагдоны. Адарддӕргонд группӕты 64,80 сомы, хистӕркъласонтӕн та хицӕн цӕуы ӕрмӕст 20 сомы. Ӕргътӕ уӕлӕмӕ кӕй цӕуынц, уымӕ гӕсгӕ 20 сом нал ӕххӕссы хӕрдзтыл. Ӕввахс рӕстӕджы бакусдзысты меню ӕмӕ йӕ ӕргътӕ фӕивыныл", - хъусын кӕны пресс-службӕ ахуырады министры хӕдивӕг Лолаты Асланы ныхӕстӕ.
Пресс-службӕйы хъусинагмӕ гӕсгӕ, нырма ахуырадон уагдӕтты аходӕн кӕнынц раздӕрау, ӕрмӕст пандемийы тыххӕй фӕкарздӕр сты санитарон домӕнтӕ.