ЦХИНВАЛ, 12 ноя - Sputnik, Плиты Фатимӕ. Хуссар Ирыстоны архайгӕ ӕнтыстджын уӕзисӕг Джиоты Александр ссис Уӕрӕсейы фыццагады призер, фехъусын кодта Sputnik йӕ тренер Плиты Артур.
Ерыстӕ цыдысты Цӕцӕны 1-10 ноябрьмӕ.
"Джиоты Александр ӕмткӕй систа 301, уыдонӕй "рывокӕй" 135, "толчокӕй" - 166. Уый хыгъды ссис бронзӕйон призер. Уый у иттӕг хорз бӕрӕггӕнӕн мӕ хъомылгӕнинагӕн. Уымӕй хуыздӕр хатдзӕг чи равдыста, уыдон дӕр бирӕ хуыздӕр нӕ архайдтой", - загъта Плиты Артур.
Тренер ма бафтыдта, президенты финансон ӕххуысы фӕрцы рацыдысты цӕттӕгӕнӕн ахуыртӕ Уӕрӕсейы.
Хуссар Иры уӕзисӕг ссис Уӕрӕсейы фыццагады призер
© Из архива Артура Плиева
"Таганрогы уыдыстӕм рӕвдзыты, уый фӕрцы хуыздӕр уыд Джиоты Александры ралӕуд ерысты. Президент Бибылты Анатолийӕ дарддӕр нӕм сӕ хъус дарынц фӕсивӕдон политикӕйы комитет", - бафтыдта тренер.
Джиоты Александр цӕттӕ кӕны Цхинвалы Плиты Артуры къухдариуӕгадӕй, Уӕрӕсейы та йӕ цӕттӕ кӕны Наниты Алан.