ЦХИНВАЛ, 16 мар – Sputnik, Тъехты Дзерассӕ. Хуссар Ирыстоны столицӕйы ӕртыццӕджы бафыстой ӕмархайды фӕдыл меморандум республикӕйы Экономикон райрӕзты министрад ӕмӕ Сауденджызон экономикон ӕмгуыстады фӕдыл уырыссаг националон комитеты хсӕн.
Документы бын сӕ къухфысттӕ ӕрӕвӕрдтой Хуссар Иры экономикон райрӕзты министр Тадататы Дзамболат ӕмӕ уӕрӕсейаг делегацийы къухдариуӕггӕнӕг Виктор Архипов.
Цхинвалы бафыстой документ, кӕцыйы нысан у Хуссар Иры хӕххон ӕрткъахӕн къабазы райрӕзт
© Sputnik / Natalia Airiyan
Фембӕлды рӕстӕджы Тадтаты Дзамболат бузныджы ныхӕстӕ загъта уазджытӕн республикӕмӕ сӕ хъусдарды тыххӕй.
"Хуссар Ир у ӕвзонг бӕстӕ, кӕцыйы сӕйраг нысан у ӕппӕтварсон райрӕзт. Бӕстӕйы разамынад сӕвӕрдта хӕс - экономикӕйы алыгъуызон къабӕзты райрӕзты фӕрцы рахизын хиифтонгадмӕ. Уый тыххӕй махмӕ ис ӕппӕт фадӕттӕ дӕр", - загъта уый.
Виктор Архипов нывс бавӕрдта, комитет цӕттӕ кӕй у Хуссарирыстонимӕ ӕппӕтварсон ӕмгуыстадмӕ.
"Нӕ проекттӕ абон куы срӕвдз кӕнӕм, уӕд цы сфӕнд кодтам, уыдон бӕрӕг ӕмгъуыдмӕ сараздзыстӕм - сӕндиддзӕн Къуаисайы ӕрзӕткъахӕн. Фӕлӕ ма нӕм ис хъӕууонхӕдзарадон ӕмӕ социалон фадыгмӕ хауӕг ӕнхъарӕнтӕ дӕр", - банысан кодта уый.
Цхинвалы бафыстой документ, кӕцыйы нысан у Хуссар Иры хӕххон ӕрткъахӕн къабазы райрӕзт
© Sputnik / Natalia Airiyan
Мадзалы рӕстӕджы ма уӕрӕсейаг делегацийы минӕвӕрттӕ фехъусын кодтой, зӕгъгӕ, ӕрзӕткъахӕн сӕндидзын кӕныны фӕлгӕтты ма кӕй сахуыр кӕндзысты йӕ алыварс территорийы ресурстӕ дӕр.
Бафыстгонд документы фӕлгӕтты Хуссар Ирыстоны модернизаци ӕмӕ рацарӕзт ӕрцӕудзӕн хӕххон комбинат Къуаисайы ӕрзӕткъахӕны бындурыл ӕмӕ йӕ продукцийы рацарӕзты фабрикӕ.
Афтӕ ма документы хынцыд ӕрцыд уазӕгдонон комплекс, культурон-хиирхӕфсӕн ӕмӕ ӕндӕр ӕнӕмӕнгхӕуӕг уагдӕтты арӕзтад.