ЦХИНВАЛ, 30 мар - Sputnik, Плиты Фатимӕ. Хуссар Ирыстоны Дзауы районы Синагуры хъӕумӕ айгӕрстой фӕндаг, фехъусын кодтой Sputnik республикон автомобилон фӕндӕгты комитеты пресс-службӕйы.
Ацы комы цӕрӕн пункттӕ миты ахӕсты уыдысты ӕртӕ къуырийы бӕрц.
"Дыццӕджы фӕндагон службӕтӕн бантыст расыгъдӕг кӕнын трассӕ хъӕпӕнтӕй ӕмӕ алыг кӕнын фӕндаг. Хӕдтулгӕтӕ цӕуынц ӕнӕкъуыхцыйӕ", - загътой уагдоны.
Синагуры хаххыл ис хъӕутӕ Карзман, Жалабет ӕмӕ Теделет. Ам ӕмткӕй цӕры 57 бинонтӕ, стӕй ма дзы ис арӕнхъахъхьӕнджыты пункт дӕр. Къуайсайӕ сты 20 километры мидӕгдӕр ӕвӕрд.