ЦХИНВАЛ, 11 апр — Sputnik, Хъуылымбегты Зӕлинӕ. Цхинвайлаг спортсментӕ рамбылдтой 16 майданы ленк кӕнынӕй ерысты "Mad Wave Classic"-ы, фехъусын кодта Sputnik ленк кӕныны тренер Евгения Терлеева.
Ерыстӕ цыдысты 9-10 апрелы Доны стадион "Динамо"-йы Мӕскуыйы. Хайад дзы райстой 976 спортсмены, Хуссар Ирыстоны кад хъахъхъӕдтой 30 адӕймаджы.
"Ерысты хатдзӕгтӕм гӕсгӕ, фыццаг бынӕттӕ дыууӕ дистанцийыл бацахста Уалыты Даяна, дыккаг бынӕттӕ – Лалыты Арсен, Уалыты Тамила, Тасойты Арсен ӕмӕ Уалыты Даяна. Кады пьедесталы ӕртыккаг къӕпхӕнмӕ схызтысты – Уалыты Александра, Лалыты Асрен, Зассеты Марат ӕмӕ Уалыты Тамила", - загъта тренер.
Спортсментӕ ерыстӕм цӕттӕ кодтой Евгения Терлеева, Тъотъоты Хасан ӕмӕ Плиты Ацӕмӕзы къухдариуӕгады бын.
Хуссар Иры ленкгӕнджытӕ рамбылдтой 16 хорзӕхы ерысты Мӕскуыйы
© Из архива Е.Терлеевой.
"Ралӕудты фӕстиуджытӕ мӕ зӕрдӕмӕ фӕцыдысты, фӕлӕ нӕ бон фылдӕр уыд саразын. Ныр хъӕуы, цӕмӕй сывӕллӕттӕ раст хатдзӕгтӕ скӕной", - загъта уый.
Уый размӕ Хуссар Ирыстоны ленкгӕнджытӕ хайад райстой ерысты, кӕцытӕ нывонд уыдысты Казахстаны сгуыхт тренер Александр Клюкины мысӕнӕн. Ерысты фӕстиуджытӕм гӕсгӕ, цхинвайлаг спортсменкӕ Уалыты Валерия рамбылдта дыууӕ ӕвзист майданы.