ЦХИНВАЛ, 27 апр — Sputnik, Гӕбӕраты Элина. Хуссар Ирыстоны ссардтой поэт, тӕлмацгӕнӕг, литературон критик, публицист Бестауты Георгийы рухс ном. Фӕндзӕм майы йыл сӕххӕст уыдаид 90 азы.
Мысӕн мадзал ацыд Анахарсисы номыл республикон библиотекӕйы Цхинвалы. Организатортӕ радзырдтой поэты цард ӕмӕ сфӕлдыстадыл, горӕты скъолаты ахуырдзаутӕ та бакастысты йе ‘мдзӕвгӕтӕ.
Бестауты Георгийы мысӕн изӕр
© Sputnik / Natalia Airiyan
Ирон литературӕйы профессор Плиты Гацыры ныхӕстӕм гӕсгӕ, Георгий лӕмбынӕгӕй куыста алкӕцы уацмысыл дӕр. Бестауты Георгий уыд ӕрмӕст номдзыд фыссӕг ӕмӕ поэт нӕ, фӕлӕ ма диссаджы адӕймаг дӕр, зондджын ӕмӕ уӕздан.
Профессор бафтыдта, зӕгъгӕ, уыдон Бестауты Георгиимӕ уыдысты ӕмгӕрттӕ.
"Йӕ куыстытӕ Георгий ныууагъта Джусойты Нафийӕн, кӕцы сӕ ӕрӕмбырд кодта ӕмӕ сӕ рауагъта ӕртӕ томы. Уый мын сӕ ӕрбахаста, ӕмӕ абон мӕ бон у зӕгъын, ахӕм ӕнӕаргъ чингуытӕ мӕнмӕ кӕй никуы уыд ӕмӕ, ӕвӕццӕгӕн, нӕдӕр уыдзӕн", - загъта Плиты Гацыр.
Бинонты номӕй мадзалы организатортӕн бузныг загъта поэты лӕппу, Хуссар Ирыстоны УУМ сӕргълӕууӕджы фыццаг хӕдивӕг Бестауты Ацӕмӕз.
Бестауты Георгийы мысӕн изӕр
© Sputnik / Natalia Airiyan
"Бузныг, кӕй хъуыды кӕнут мӕ фыды, йӕ сфӕлдыстад. Уӕлдай бузныг мӕ фӕнды зӕгъын Плиты Гацырӕн йӕ хъарм ныхӕсты тыххӕй. Хъыгагӕн, махмӕ къаддӕр кӕны ӕвзонг поэтты нымӕц, кӕцытӕ балӕуыдаиккой нӕ литературӕйы раздзогты бынаты, фӕлӕ зӕрдӕ райы, сывӕллӕтты сӕ сфӕлдыстад афтӕ тынг кӕй цымыдис кӕны", - загъта Бестауты Ацӕмӕз.
Бестауты Георгийы мысӕн изӕр
© Sputnik / Natalia Airiyan