ЦХИНВАЛ, 12 май – Sputnik, Плиты Фатимӕ. Фӕстаг рахызт сценӕмӕ, фӕстаг къухӕмдзӕгъд ӕмӕ ӕнӕкӕрон дидинтӕ. Цхинвалы фӕстаг хӕрзбон загътой Хуссар Ирыстон ӕмӕ Цӕгат Ирыстоны адӕмон артисткӕ Хъӕцмӕзты Фатимӕйӕн. Церемони ацыд паддзахадон драмон театры сценӕйыл.
"Йӕхӕдӕг равзӕрста ӕппӕт дӕр йӕ фӕстаг балцӕн - йӕ дарӕс ӕмӕ къахдзаума. Йӕ операцийӕ иу аз рацыд ӕмӕ нал ис", - загъта зындгонд артисткӕйы хӕстӕджытӕй иу.
Сценӕйыл зианы цур ӕрбамбырд сты йе 'ввахс адӕм, коллегӕтӕ ӕмӕ театралон факультеты студенттӕ. Адӕмы куыд сиу ис траурон музыкӕимӕ.
Хуссар Иры фӕстаг хӕрзбон загътой Хъӕцмӕзты Фатимӕйӕн
© Sputnik
"Фӕндыд дӕ банысан кӕнын дӕ юбилей сценӕйыл. Равзӕрстай спектакль дӕр. Уым дӕ фӕндыд ахъазын. Дӕ бӕллиц сӕхххӕст ис, абон у дӕ фӕстаг спектакль", - загъта театры аивадон къухдариуӕггӕнӕг Дзудцаты Тамерлан.
Уый банысан кодта, Хъӕцмӕзты Фатимӕ кӕй уыд ӕнахуыр тыхджын, размӕтырнаг адӕймаг.
"Сидзӕрӕй нӕ ныууагътай. Ничиуал ӕрбахиздзӕн ӕмӕ зӕгъдзӕн: "ӕнӕхъуаджы цӕмӕ бадут?". Дӕ бирӕ фӕлгонцтӕй абон ӕххӕст кӕныс иууыл трагикон, уымӕн ӕмӕ цӕуыс махӕй", - бафтыдта аивадон къухдариуӕггӕнӕг.
Цы бирӕ адӕм ӕрбацыдысты театрмӕ актрисӕйӕн хӕрзбон зӕгъынмӕ, уыдон нымӕцы уыдысты сфӕлдыстадон интеллигенци ӕмӕ республикӕйы разамынад дӕр.
"Ӕрӕджы равдыста театры йе 'вӕрд спектакль, йӕхӕдӕг дӕр ма уыд "Фӕстаг ӕвдисӕны"-ы премьерӕйы, фӕлӕ уӕд сценӕйыл нал уыд, йӕ рыст ӕмӕ низимӕ тох кодта. Рухсаг у, нӕ хӕлар", - загъта президент Бибылты Анатолий.
Хуссар Иры фӕстаг хӕрзбон загътой Хъӕцмӕзты Фатимӕйӕн
© Sputnik
Хуссар Ирыстоны ӕмӕ Цӕгат Ирыстоны адӕмон артисткӕ йе 'нусон бынат ссардта Национ пантеоны республикӕйы разагъта адӕмы хсӕн. Йӕ цуры ныгӕд ис йӕ коллегӕ, адӕмон артисткӕ Галуанты Людмила.