ЦХИНВАЛ, 17 май – Sputnik, Плиты Фатимӕ. Хуссар Ирыстоны столицӕйы цӕгаттаг микрорайонтӕ, кӕцыты ис ӕдзухон донифтогад, дыццӕджы баззадысты ӕнӕ донӕй, фехъусын кодта Sputnik "Водоканал"-ы генералон директор Цхуырбаты Алан.
Уагдон дыццӕджы ахицӕн кодта Едыс-Цхинвалы магистралон хахх, уымӕ гӕсгӕ ӕнӕ донӕй аззадысты микрорайонтӕ Мӕскуыйаг, Цӕгаттаг, Хурзӕрин ӕмӕ БАМ.
"Горӕты дыууӕ бынаты ис аваритӕ. Районгай сын ахицӕн кӕныны фадат нӕ уыд, уымӕ гӕсгӕ бахъуыд магистралон хахх ахицӕн кӕнын", - загъта Цхуырбаты Алан.
Уый ма бафиппайдта, изӕрмӕ куыстытӕ кӕй хъуамӕ ахицӕн уой.
"Столицӕйы донифтонгад изӕры иууылдӕр сӕндидзын кӕндзыстӕм. Уанат - Цхинвалӕй чи исы дон, уыдон та бынтондӕр нӕ рахатдзысты проблемӕ", - бафтыдта "Водоканал"-ы директор.
Хуссар Ирыстоны столицӕ донӕй ифтонг цӕуы дыууӕ линийӕ - Едыс-Цхинвал ӕмӕ Уанат-Цхинвалӕй.