ЦХИНВАЛ, 18 май – Sputnik, Плиты Фатимӕ. Цхинвалы паддзахадон театры сценæйыл ацыд æрхонгæ режиссер Чумаченко Иваны æвæрд спектакль "Мирандолинæйы хабæртты" премьерæ. Фыццаг равдыст æрæмбырд кодта æххæст зал.
Спектакль "Трактирщица"
© Sputnik / Natalia Airiyan
"Мирандолинæйы хабæрттæ" æвæрд æрцыд италиаг фыссӕг Карло Гольдонийы пьесæ "Трактирщица"- мæ гæсгæ. Спектаклыл кусджытæ бацæттæ кодтой италиаг царды фæлыст, дарæсæй райдайгæйæ. Ирон актертæ ралæууыдысты сеньор æмæ синьоринаты фæлгонцты.
"Нæ театры алы равдыст дæр у бæрæгбоны хуызæн. Рахицæн кæнын хъæуы актерты равзæрст æмæ режиссеры куыст. Иу уысм дæр мæ хъусдард сценæйæ нæ ахицæн. Тынг мæ зæрдæмæ фæцыд сæйраг хъайтар Хаситы Эмма æмæ актер Гаглойты Эдуард", - загъта аивæдты лицейы ахуыргæнæг Цгъойты Арина.
Комедийæн разынд куыд табугæнджытæ, афтæ фауджытæ дæр.
"Паддзахадон драмон театры æмвæзад нæу. Ирон театры сценæйыл цы æвдисынц, уымæ хъуамæ ирондзинад чысыл хæццæ кæна", - загъта Харебаты Зæринæ.
Спектакль "Трактирщица"
© Sputnik / Natalia Airiyan
Хуссар Ирыстоны паддзахадон труппӕимæ бакуыста ӕвзонг курдиатджын режиссер, "ГИТИС"-ы рауагъдон Чумаченко Иван.
Уӕрӕсейӕг режиссер кусы Советон цӕдисы раздӕры республикӕты ӕмӕ Уӕрӕсейы регионты. Ӕвзонг специалист, кӕцы ахуыр фӕцис ӕрмӕст 2021 азы, сæвӕрдта ныр ӕстӕм спектакль.
Пьесӕ "Трактирщица"-йы ахӕссӕн ис драматикон комедимӕ. Архайд цӕуы уындджын сылгоймаг Мариандолинайы алыварс. Ӕрмӕг у Хуссар Ирыстоны театрӕн йӕхи ӕвзӕрст.
Уымæй раазмæ, Чумаченко Sputnik радзырдта , уый кæй у XVII ӕнусы ӕрмӕг, у иуӕй худӕг, фӕлӕ дзы ис нӕлгоймаджы трагеди дӕр. Иудзырдӕй, ӕнкъард комеди у. Сӕйраг хъайтар Мирандолинæ дӕр фӕстагмӕ йӕ лымӕнты фесафдзӕн.