ЦХИНВАЛ, 15 июн — Sputnik, Плиты Фатимӕ. Хуссар Ирыстоны Знауыры районы Нагутнийы хъӕумӕ хӕстӕг донхосгӕнӕндон "Ныфс" 25 июнӕй райдайдзӕн йӕ куыст, фехъусын кодта Sputnik республикӕйы Профцӕдисты сӕрдар Джергаты Жанна.
Улӕфӕндон у Хуссар Ирыстоны иунӕг донхосгӕнӕндон, кӕцы йӕ истори кӕны советон дугӕй. Фӕстаг ӕзты ма фӕзынд донхосгӕнӕндӕттӕ Згъубир ӕмӕ Къуайсайы, фӕлӕ уыдонӕн сӕ авналӕнтӕ сты къаддӕр.
"25 июны скусдзӕн. Профцӕдисты уылты самал кӕнӕн ис балцӕгтӕ дӕс бонмӕ, науӕд фылдӕр кӕнӕ къаддӕр ӕмгъуыдмӕ. Ам улӕфджытӕн ис ваннӕтӕ, цӕрӕн бынӕттӕ, ӕртӕ хатты аходӕн ӕмӕ уӕлӕмхас аргъы лӕггӕдтӕ", - загъта уый.
Улӕфӕндоны, бафтыдта профцӕдисты сӕргълӕууӕг, фӕстаг ӕзтӕм абаргӕйӕ ныр фӕхуыздӕр сты уавӕртӕ.
"Ныридӕгӕн дзы ис рухс ӕмӕ куыст цӕуы интернетӕй сифтонг кӕныныл дӕр. Уымӕй дарддӕр ма дзы хуыздӕр кӕнынц цӕрыны уавӕртӕ", - радзырдта Джергаты Жаннӕ.
Улӕфӕндонмӕ балцӕгтӕ райсын сӕ бон у куыд бынӕттон цӕрджытӕн, афтӕ Цӕгат Ирыстоны ӕмӕ ӕмткӕй Уӕрӕсейӕ минӕвӕрттӕн.
Балцӕджы аргъ 10 боны ӕмгъуыдмӕ лӕууы 14 мин сомы.
"Къаддӕр ӕргътыл балцӕгтӕ райсӕн вӕййы ӕнӕниздзинад хъахъхъӕныны министрады уылты ӕмӕ профцӕдисты уӕнгтӕн", - балхынцъ кодта Джергаты Жанна.