ЦХИНВАЛ, 23 июн – Sputnik. Националон æфсады къухдариуæгад аразы алы уавæртæ дæр, цæмæй хуссарирыстойнаг абитуриенттæ ахуыр кæной Уæрæсейы Федерацийы иууыл хуыздæр ахуыргæнæндæтты. Уый тыххæй фехъусын кодта Хуссар Ирыстоны хъахъхъæнынады министры хæстæ æххæстгæнæг Пухаты Владимир Кадетон скъолайы рауагъдонтæн арфæгæнгæйæ.
Уæрæсейы æфсæддон ахуыргæнæндæттæм бацæуæн фæлварæнтæ райдыдтой 20 июны. Чызджытæ æмæ лæппутæн фадат ис бацæуын уæрæсейаг хъахъхъæнынадон уагдоны 17 ахуыргæнæндонмæ.
Абитуриенттæ ныридæгæн рацыдысты психологон тест, радтой нормативтæ физикон цæттæкæнынадæй. Сабаты, 25 июны, фæсивæд фысдзысты диктант уырыссаг æвзагæй. Аннæ фæлварæнтæ уыдон ратдзысты ног къуыри.