ЦХИНВАЛ, 24 авг – Sputnik, Плиты Фатимӕ. Хуссар Ирыстоны Ленингоры районы Гуырдзыстонимӕ арӕныл уадзӕн пункты фӕстаг цалдӕр боны змӕлы бирӕ адӕм - Чысангомы цӕрджытӕн 20 августӕй фӕзынд фадат ацӕуын Гуырдзыстонмӕ ӕмӕ ӕрбаздӕхын фӕстӕмӕ.
Развӕлгъау хъӕуы райсын пропуск. Гӕххӕттыты фидар кӕныны хъуыддаджы цӕрджытӕн ӕххуыс кӕны районы разамынад.
"Куыддӕр фехъусын кодтам адӕмӕн, афтӕ нӕм иу бонмӕ сӕ гӕххӕттытӕ ӕрбавдыстой 500 адӕймаджы. Кӕмӕндӕрты ис архайгӕ пропусктӕ 2019 азӕй. 150 фылдӕр та нӕм ис ирон паспорт райсыны тыххӕй куырдиӕттӕ", - загъта районы администрацийы хистӕры фыццаг хӕдивӕг Девидзе Реваз.
"Раздӕхӕн" ныр кусы цалдӕр боны. Ацы ӕмгъуыд бирӕтӕ спайда кодтой цыбыргонд фӕндаджы гомӕй, аннӕ ӕнхъӕлмӕ кӕсынц сӕ гӕххӕттытӕм, бирӕтӕ та сӕ зӕнӕджы ӕрбацыдмӕ. Ногдзинӕдтӕ ныр сты, дуканиты, уынгты ӕмӕ кафеты адӕм цӕуыл дзурынц, уый сӕйраг темӕ. Ацы фарст афтӕ катайаг уыд районы цӕрджытӕн ӕмӕ сӕ цыма ӕндӕр ницы тыхсын кӕны, уый хуызӕн у уавӕр.
Ленингор
© Sputnik / Natalia Airiyan
"Ӕртӕ азы нӕ федтон ӕмӕ сывӕллӕттӕ ӕмӕ сӕ зӕнӕджы. Ныр ӕнхъӕлмӕ кӕсын се 'рцыдмӕ. Мӕхицӕн та ис цыппар операци ӕмӕ мӕ ӕдзух хъӕуы цӕуын дохтыртӕм", - дзуры посёлочы цӕрӕг Марина.
Кӕд раздӕр бынӕттон цӕрджытӕ нӕ разы кодтой журналисттимӕ ныхас кӕныныл, уӕд ныр та рӕвдзӕй дзурынц бузныджы ныхӕстӕ республикӕйы хицауадӕн ӕмӕ ӕвдисынц сӕ цины ӕнкъарӕнтӕ.
"Ног хицауадӕй нӕ зӕрдӕтӕ райынц. Президент йӕ ныхӕстӕ ӕххӕст кӕны. Стӕй бынӕттон разамынад дӕр адӕммӕ лӕууы ӕввахсдӕр, хъусынц нын нӕ ныхас, немӕ ныхасмӕ ӕргом сты", - загъта поселочы цӕрӕг Тадтаты Циури.
Сӕ хиуӕтты феныны уӕлдай ма ныр ленингойрӕгтӕн фадат ис сыхаг бӕстӕйы медицинон лӕггӕдтӕй пайда кӕнын.
Ленингор
© Sputnik / Natalia Airiyan
"Владимир Путин, Гаглойты Алан ӕмӕ Гӕджиты Илларионӕн се' ппӕтӕн дӕр бузныг. Абон уыдтӕн Тбилисы дохтыртӕм ӕмӕ фӕстӕмӕ дӕр фездӕхтӕн", - дзуры Бирюкова Анна.
Ленингор
© Sputnik / Natalia Airiyan
Ленингоры цӕрджытӕй, кӕцытӕ ӕртӕ азы цардысты ӕхгӕд арӕнты, алкӕмӕн дӕр ис йӕхи цыбыр истори. Кӕмӕндӕр ацы рӕстӕг фӕзиан сты йӕ ныййарджытӕ, ныр цӕуынц сӕ ингӕнтӕ уынынмӕ, аннӕтӕн сӕ сывӕллӕттӕн райгуырд зӕнӕг, ӕртыккӕгтӕ та рагӕй нӕ федтой сӕ хиуӕтты.
Уадзӕн пункт "Раздӕхӕн"
© Sputnik / Natalia Airiyan