ЦХИНВАЛ, 17 ноя – Sputnik, Плиты Фатима. Хъӕууон хӕдзарады министрад ӕмӕ Цхинвалы бирӕпрофилон колледжы ӕмгуыстады фӕлгӕтты ахуыргӕнӕн уагдон бацӕттӕ кӕндзӕн специалисттӕ министрадӕн. Ныридӕгӕн уым ахуыр кӕнынц министрады кусджытӕ агрономы дӕсныйадыл, фӕстӕдӕр та дзы конд ӕрцӕудзӕн механизаторы курсытӕ.
"Ныридӕгӕн кусӕм механизаторы курсытӕ бакӕныны тыххӕй лицензи райсыныл. Ахуыр цӕудзӕн дыууӕ мӕйы онг, стӕй сын лӕвӕрд ӕрцӕудзӕн гӕххӕтытӕ ӕмӕ уый бындурыл та лӕвӕрд цӕудзысты тракторыл скъӕрыны бартӕ", - загъта Sputnik ахуыргӕнӕн уагдоны хистӕр Цыхуырбаты Лира.
Уый ма бафтыдта, хъӕууон хӕдзарады министрадимӕ сӕ фыццаг иумӕйаг проект кӕй нӕу. Хъӕууон хӕдзарады министрад ӕмӕ Цхинвалы бирӕпрофилон колледжы ӕмгуыстады фӕлгӕтты агрономийы хаххыл сӕ уагдоны ахуыр кӕнынц Карантинон службӕйы кусджытӕ.
"Ӕрӕджы сын уыд практика дӕр, куыстой Знауыры районы Уелиты быдырты. Сты ӕвзыгъд ахуырмӕ",- бафтыдта уый.
Хъӕууон хӕдзарады министр Мӕргъиты Аланы ныхӕстӕм гӕсгӕ, уыдон хъавынц саразын ӕмгуыстады бадзырд Цӕгат Ирыстоны профилон ахуыргӕнӕн уагдонимӕ специалисттӕ цӕттӕ кӕныны фарсты.