ЦХИНВАЛ, 21 ноя — Sputnik, Плиты Фатимӕ. Стыр уӕзы боксер Джиоты Арсен ссис "Кубок России"-йы финалист Санкт-Петербурджы, фехъусын кодта Sputnik спортсмены тренер Хаситы Владислав.
Ерыстӕ цыдысты иу къуырийы дӕргъы ӕмӕ ахицӕн сты хуыцаубоны.
"Уӕрӕсейы Кубок"-ы ерысты Арсен ауагъта ӕртӕ тохы ӕмӕ ӕрмӕст финалы фӕхӕрд ис хъырымаг боксерӕн", - загъта тренер.
Хаситы Владислав ма банысан кодта, турниры хатдзӕгтӕм гӕсгӕ, йӕ хъомылгӕнинаг бацыд Уӕрӕсейы ӕрыгӕдты национ ӕмбырдгонды скондмӕ.
Ӕрӕджы ма Арсен рамбылдта ноджы иу гуырахстджын турнир Санкт-Петербурджы, цӕттӕ дӕр кӕны уым. Куыд йӕ кары иууыл цӕттӕдӕр ӕмӕ курдиатджындӕр боксер, афтӕ йӕ райстой Санкт-Петербурджы спортивон ахуыргӕнӕндон "Олимпийские надежды"-мӕ.
Хуссар Ирыстоны боксы скъолайы хъомылгӕнинаджы цӕттӕ кӕнынц тренертӕ Хаситы Владислав ӕмӕ Санахъоты Аслан.