ЦХИНВАЛ, 9 янв — Sputnik, Гæбæраты Элина. Горæт Цхинвалы администрацийы хæрзарæзтады фæткдаруаты кусджытæ уынгтыл æркалдтой сæрмагонд буарад кæлæхы ныхмæ, фехъусын кодта Sputnik столицæйы хæрзарæзтады фæткдаруаты сæргълæууæг Габуты Инал.
Уый бахахх кодта митсæрфæн техникæ кæй райдыдта кусын сабаты.
"Уынгтыл зилын райдыдтой сæрмагонд техникæйы 12 иуæджы. Фæндагон таджгыл калынц сæрмагонд буарад, цæмæй хæдтулгæтæн се 'змæлд уа æдас. Уымæй дарддæр ма кусджытæ къухæй дæр кусынц тротуартыл, фистæгæй цæуджыты æдас змæлды тыххæй", - загъта Габуты Инал.
Куыд сбæлвырд кодта горæты администрацийы хæрзарæзтады фæткдаруаты сæргълæууæг, афтæмæй митимæ тохы бацыдысты уагдоны кусджытæ се ᾿ппæт дæр.
Раздæр горæты Администрацийы радзырдтой, цæттæ кæй сты зымæгон сезонмæ. Хæрзарæзтады фæткдаруаты кусдзысты дарддæр, ифтонг сты æнæмæнгхъæуæг техникæйæ.