ЦХИНВАЛ, 15 авг - Sputnik. Хуссар Ирыстоны президент Гаглойты Алан арвыста тел тæфæрфæстимæ Дагестаны сæргълæууæг Сергей Меликовæн Махачкалайы трагедийы тыххæй, хъусын кæны паддзахады сæргълæууæджы пресс-службæ.
"Дагестаны столицæйы æртаджы станц "Нафта-24"-йы районы трагикон цау, кæцы ахаста æртын фондз адæймаджы цард, байдзаг кодта нæ зæрдæтæ рыст æмæ хъыгдзинадæй", - дзырдæуы хъусинаджы.
Хуссар Ирыстоны адæмы номæй æмæ сæрмагондæй йæхицæй дæр президент тæфæрфæс кæны зианбаййафджыты æввахс æмæ хæстæг адæмæн, æвирхъау трагедийы фæцæфуæвджытæн та йæ зæрдæ загъта, цæмæй тагъддæр сæнæниз уой.
Махачкалайы 14 августы изæры горæтгæрон ссыгъд автосервис, уый фæстæ зынгсивæрзт апырх ис æртаджы станцыл, æрцыд срæмыгъд. Уæрæсейы УУМ фехъусын кодтой, зынгсивæрзт кæй æрцыд 600 квадратон метры фæзуатыл, фæзиан сты 35 адæймаджы. Æнæниздзинад хъахъхъæнынады министрад фехъусын кодта 63 госпитализацигонд адæймаджы тыххæй.
Дагестаны 15 август расидтысты Фыдохы бон.