ЦХИНВАЛ, 25 апр – Sputnik, Дзæгъиаты Олег. Уæрæсейаг инвесторты делегаци компани "Стройпрогресс"-ы бындурæвæрæг æмæ президент Джуссойты Альберты сæргълæудæй æрцыд Хуссар Ирыстонмæ дыууæбонон кусæгон балцы.
Делегацийы сконды ма сты "Стройпрогресс"-ы вице-президент, Хуссар Ирыстоны раздæры премьер-министр Юрий Морозов, Уæрæсейы иууыл егъаудæр хисæрмагонд нефты компанитæй иу "Руснефтегаз"-ы генералон директор Цоциты Феликс, компанитæ "ИСМЛ" æмæ "Зубовский Бульвар"-ы генералон директор Пухаты Альберт, батальон "Алания"-йы штабы хистæр Остъаты Руслан "Скиф", 70-æм гвардеон мотоæхсæн полчы командæгæнæджы хæдивæг, Уæрæсейы Федерацийы хъайтар Абайты Юрий, афтæ ма зарæггæнæг, Уæрæсейы сгуыхт артист Цæрикъаты Феликс.
Уæрæсейаг инвесторты делегаци æрцыд Хуссар Ирмæ кусæгон балцы
© Sputnik / Михаил Авагимов
Делегаци, кæцыйыл фæндагыл сæмбæлд Хуссар Ирыстоны премьер-министр Джуссойты Константин, бабæрæг кодта скъола-интернат Дзауы поселочы. Уазджытыл традицимæ гæсгæ сæмбæлдысты æртæ уæлибых æмæ ирон бæгæныимæ, уый фæстæ Джуссойты Альберт радта ахуырадон уагдонæн лæвæрттæ – компьютертæ, принтертæ, интерактивон фæйнæг æмæ спортивон ифтонггарз.
Уæрæсейаг инвесторты балцы фæлгæтты ацæудзæн фембæлд Хуссар Ирыстоны президент Гаглойты Аланимæ республикæйы социалон-экономикон райрæзты фарстыты фæдыл.