ЦХИНВАЛ, 27 авг — Sputnik, Плиты Фатимæ. Цхинвалы ацыд Хуссар Ирыстоны хæдбардзинад Уæрæсейы рдыгæй банымайыны Бонæн нывонд бæрæгбонон æмбырд. Мадзалы хайад райстой республикæйы къухдариуæгад, хицауады уæнгтæ, депутаттæ, бæстæйы раздæры президенттæ – Цыбырты Людвиг æмæ Тыбылты Леонид, Цæгат Ирыстон, Абхаз æмæ Дагестанæй цытджын уазджытæ, Уæрæсейы Паддзахадон думæйы минæвæрттæ.
Æмбырд бакодта видео "Нæ уæлахизи истори", цы ран цæрджытæ радзырдтой сæ тæлмæнтæ 2008 азы 26 августы цауты тыххæй.
Бæрæгбоны фæдыл æрæмбырдуæвджытæн раарфæ кодта республикæйы президент Гаглойты Алан. Паддзахады сæргълæууæг бахахх кодта, 2008 азы 26 август кæй ссис амонд æмæ ныфсы бон алкæмæндæр.
"Хуссар Ирыстон æмæ Абхазы паддзахадон хæдбардзинад банымайыны фæдыл скъуыддзаг равдыста Уæрæсейы иузæрдыгдзинад æхсæнадæмон барадæн. Ацы скъуыддзаг радта хъахъхъæнынады гарантитæ æфсæддон архайды ныхмæ Гуырдзыстоны рдыгæй. Хæдбардзинады банымад радта фадат аразын паддзахад æмæ райтынг кæнын социалон-экономикон къабаз Уæрæсейы æххуысæй", - загъта президент.
Бæрæгбонон æмбырды ма ралæууыд Уæрæсейы минæварады минæвар Хуссар Ирыстоны Александр Журов. Уый раарфæ кодта Хуссар Ирыстоны адæмæн Уæрæсейы минæвар республикæйы Марат Кулахметовы номæй. Дипломат ма бакаст арфæйы тел Уæрæсейы Федерацийы æдасдзинады Советы сæргълæууæджы хæдивæг Дмитрий Медведевæй.
Уымæй дарддæр арфæйы ныхæстимæ ралæууыдысты республикæйы уазджытæ.
Цхинвалы ацыд хæдбардзинады банымады Бонæн нывонд бæрæгбонон æмбырд
© Sputnik / Михаил Авагимов