ЦХИНВАЛ, 29 окт – Sputnik, Плиты Фатимæ. Хуссар Ирыстоны фæнд кæнынц саразын æппæтдунеон æхсæнадон змæлд "Иры стыр ныхас"-ы фæсивæдон хайад. Уый тыххæй фехъусын кодта республикæйы президент Гаглойты Алан "Иры стыр ныхас"-ы хуссарирыстойнаг хайады хыгъдон-æвзæрстон конференцийы рæстæджы.
"Хуссар Ирыстоны куыст цæуы "Иры стыр ныхас№-ы фæсивæдон хайад саразыны фæдыл. Нæ хæс у бакæнын советы скондмæ фæсивæды минæвæртты. Цæгат Ирыстоны ацы куыст æрнывыл кодтой. Æмæ фæсивæдон къабазы проблемон фарстытæ иумæйагæй скъуыддзаг кæнынц хистæр кары адæм æмæ фæсивæды минæвæрттæ", - загъта президент.
Цхинвалы цæуы æппæтдунеон æхсæнадон змæлд "Иры стыр ныхас"хуссарирыстойнаг хайады хыгъдон-æвзæрстон конференци. Æмбырдмæ æрцыдысты делегаттæ республикæйы æппæт районтæй. Конференцийы куысты хайад райстой республикæйы президент Гаглойты Алан æмæ "Иры стыр ныхас"-ы координацион советы сæрдар Уататы Зелимхан.