ЦХИНВАЛ, 17 фев – Sputnik, Дзæгъиаты Олег. "Социалон æххуысы центр" 2024 азы материалон æххуыс бакодта Хуссар Ирыстоны 150 цæрæгæн – уыдон хыгъды лæууыдысты организацийы. Уый тыххæй фехъусын кодта Sputnik-æн организацийы разамонæг Джиоты Зæринæ.
"Ацы æххуыс мах бакодтам фæллойад æмæ социалон хъахъхъæнынады министрады руаджы. Уымæй дарддæр Центры кусджытæ ивгъуыд аз снысан кодтой æртæ адæймаджы медико-социалон центр "Забота"-мæ. Ноджы ма иу адæймаджы та Сырх Дзуары комитеты æххуысæй арвыстам хос кæнынмæ сыхаг бæстæмæ" - загъта Центры сæргълæууæг.
Джиоты Зæринæ бахахх кодта, зæгъгæ, Хуссар Ирыстоны цæрджытæн сæ бон хыгъды слæууын у Центры сæхи фæндонмæ гæсгæ кæнæ та сæ хиуæтты куырдиатæй.
Джиоты Зæринæ бафтыдта, зæгъгæ, абоны бон Центры хыгъды лæууынц Хуссар Ирыстоны 573 цæрæджы. Йæ ныхæстæм гæсгæ, уыдонæй 273 адæймагæн лæггад кæнынц бынаты – сæ хæдзæртты.