ЦХИНВАЛ, 16 май – Sputnik, Томайты Аманда. Тегераны ацыд номдзыд ирон поэт, нывгӕнӕг ӕмӕ ӕхсӕнадон архайӕг Хетӕгкаты Къостайы бюст бакӕныны цытджын церемони.
Уӕрӕсейаг зонӕдты академийы Дзӕуджыхъӕуккаг зонадон центры директор Цыбырты Алексей радзырдта, бюст кӕй бакодтой Цӕгат Ирыстоны паддзахадон университет ӕмӕ ирайнаг ахуыргондты ӕхсӕн бирӕазон ӕмархайды фӕлгӕтты.
"Алцыдӕр райдыдта "Ирон фӕндыр"-ы презентацийы фарсийы ӕвзагыл. Цӕгат Ирыстоны паддзахадон университеты делегаци ӕрласта Тегеранмӕ Хетӕгкаты Къостайы фарсимӕ тӕлмацгонд уацмыстӕ, ӕмӕ бюсты баконл уыд ацы церемонийы ахсджиаг хай", - радзырдта ахуыргонд.
Цӕгат Ирыстон ӕмӕ Ираны ӕхсӕн ӕмгуыстады ахсджиаг бынат ис зонадон ӕмӕ ахуырадон проекттӕн.
"Ирайнаг ахуыргондтӕ нӕм ӕрцӕуынц кусынмӕ архивтӕм. Нӕ коллегӕ Муса абдуллахи та ратӕлмац кодта фарсимӕ "Нарты кадджыты" хай, тагъд рӕстӕджы ацӕудзӕн йӕ презентаци. Мах пропогандӕ кӕнӕм Ирыстоны истори, ӕвдисӕм, кӕй стӕм стыр ирайнаг дунейы хай", - бахахх кодта Цыбырты Алексей.
Йӕ ныхӕстӕм гӕсгӕ, университет ӕмӕ ирайнаг ахуыргондты ӕхсӕн ахастытӕ райдыдтой рӕзын 2017 азы.