ЦХИНВАЛ, 10 фев – Sputnik, Козаты Диана. Цæгат Ирыстоны паддзахадон драмон театр 4 марты æрцæудзæн Цхинвалмæ æмæ равдисдзæн Уильям Шекспиры трагеди "Король Лир", фехъусын кодта Хуссар Ирыстоны Паддзахадон драмон театры аивадон разамонæг Джелыты Хъазбег.
"Фæнды мæ фæхонын нæ кæсджыты Уильям Шекспиры спектакль "Король Лир"-мæ. Ацы спектакль тынг ахсджиаг у Цæгат Ирыстоны театрæн дæр. Æрæджы Æлбæгаты Алан, кæцы сæххæст кодта Король Лиры фæлгонц, рамбылдта егъау театралон преми "Золотая Маска"-йы", - бахахх кодта Джелыты Хъазбег.
Аивадон разамонæг бахахх кодта, зæгъгæ, Хуссар æмæ Цæгат Ирыстоны театрты æхсæн ис æфсымæрон ахастытæ.
Йæ ныхæстæм гæсгæ, 25 февралы театры труппæ цæуы спектаклтимæ сывæллæтты театр "Саби"-мæ Дзæуджыхъæуы.
Сылгоймæгты æхсæнадæмон бонмæ та Паддзахадон драмон театр цæттæ кæны Хуыгаты Георы уацмысмæ гæсгæ комеди "Мæ усы мад".