ЦХИНВАЛ, 7 май — Sputnik, Плиты Фатимæ. Хуссар Ирыстоны Националон музей Стыр Фыдыбæстæйон хæсты Уæлахизы 81-æм афæдзыбоны цытæн сорганизаци кæндзæн тематикон равдыст æмæ мысæн мадзал.
Музейы директор Зассеты Мераб радзырдта Sputnik-æн, уагдон æрвылаз уæлдай хъусдард кæй здахы хъайтарты ном ссарынмæ.
"Махæн нæ хæс у дзурын Стыр Фыдыбæстæйон хæсты хайадисджыты тыххæй. Ацы бæрæгбонмæ мах активонæй фæпайда кæнæм нæ историон базæйæ, ацы аз мах бацæттæ кодтам къорд мадзалы", - загъта музейы директор.
Бæрæгбонон датæйы фæлгæтты музейы ацæудзæн мадзал "Они ковали Победу", уырдæм фæхондзысты скъоладзаутæ æмæ студентты. Уымæй дарддæр сорганизаци кæндзысты Уæлахизы боны цытæн равдыст. Уый кусдзæн къуырийы дæргъы, 8 майæ фæстæмæ.
Музейон программæйы сæрмагонд бынат ис Стыр Фыдыбæстæйон хæстæн нывонд экспозици.