ЦХИНВАЛ, 9 авг — Sputnik, Босыкты Наталья. Уæрæсейаг компани Sarmat TV систа видеоæрмæджытæ алайнаг-сомихаг контактты тыххæй Хуссар Ирыстоны территорийыл.
Цæгат Ирыстоны истори æмæ археологийы институты кусæг, диакон Дмитрийы ныхæстæм гæсгæ, алайнаг-сомихаг бастдзинæдты ахуыркæнынад ратдзæн уæрæхдæр зонæнтæ аланты раг историйы тыххæй, кæцытæ уыдысты ахсджиаг историкон процессы — Цæгат æмæ Хуссар Кавказы чырыстон дин парахат кæныны активон хайадисджытæ.
"Хæслæвæрд "максимум" у — алайнаг-сомихаг бастдзинæдты тыххæй фильм сисын, уый нымæцы чырыстон дины историйы контексты, кæцытæ æнæфескъуыйгæйæ сбастой дыууæ адæмы", — загъта фыд Дмитрий.
Проекты фæлгæтты ис экспедицитæ Хуссар Ирыстон æмæ Сомихстонмæ. Сæрмагондæй, ахсджиаг информаци Фырсыгъдæг Мад Майрæмы аргъуаны тыххæй, кæцы ис æвæрд Цхинвалы сомихæгты кварталы, фехъусын кодта аргъуаны динамонæг фыд Иаков (Хетæгкаты).
Уæлдай цымыдисаг ма сты рагон аргъуан æмæ уæлмæрд Ленингоры, цы ран бирæ æнусты дæргъы цардысты сомихæгтæ, афтæ ма Монастеры моладзандон, кæцы арæзт æрцыд XII-XIV æнусты сомихаг кусджыты æххуысæй.
Компани Sarmat TV генеральный продюсер Сацаты Диана бамбарын кодта, видеосюжетты серийы дзырд кæй цæудзæн æрмæст рагон истори, аргъуантæ æмæ моладзандонты тыххæй нæ, фæлæ ма бирææнусон алайнаг-сомихаг бастдзинæдтæ куыд дарддæр кæнынц абоны бон дæр.