ЦХИНВАЛ, 19 июл — Sputnik. Уæрæсейы горæт Тулæйы ацæудзысты æрвылазон фестиваль "Среднерусская возвышенность" фæлгæтты ирон культурæйы бонтæ, хъусын кæны ПТРК "Алания".
Программæйы мадзæлттæ æмæ информацион æххуысы фарстатыл ныхас цыд Цæгат Ирыстоны национ ахастдзинæдты министрады.
"Фестивалы фæлгæтты уыдзысты Республикæ Цæгат Ирыстон– Аланийы бонтæ дæр. Ам сæ арæхстдзинад равдисдзæн бæхты театр. Культурæйы бонты рæстæг фенæн уыдзæн Ирыстоны нывгæнджыты куыстытæ, Туаты Теминæйы ист киноныв, стæй Цæгат æмæ Хуссар Ирыстоны артистты концерттæ" - дзырдæуы хъусинаджы.
Фестивалы уазджытæ уыдзысты Китайы, Японийы, Венгрийы, Швейцарийы, Турчы æмæ Уæрæсейы регионты минæвæрттæ.
Фестиваль цæуы этнопарк "Золотой город"-ы фæлгæты.
