ЦХИНВАЛ, 11 окт — Sputnik, Плиты Фатимæ. Хуссар Иры каратистты æмбырдгонд аст адæймаджы скондæй стох кæндзæн Ставрополы чемпионаты, раразмæгонд къорды сконды ис Уæрæсейы спорты мастермæ кандидаттæ дæр, фехъусын кодта Sputnik спортсменты тренер Созаты Владимир.
Ныридæгæн къорд сты фæндагыл.
"Хуссар Иры æмбырдгонды скондмæ бацыдысты тыхджындæр спортсментæ. Хистæр кары стох кæндзæн Тыджыты Ирина, юношæты хсæн Дудайты Донна, Гаглойты Диана, Тадтаты Софья, Джиоты Анатолий æмæ Тадтаты Роман, уыдон сты ерысты æппынæдзух архайджытæ æмæ уæлахиздзаутæ. Ӕвæлтæрд спортсментæй сфæлвардзыстæм Абайты Камилла æмæ бынтон æрыгон чызг Тедеты Азæйы", - загъта Созаты Владимир.
Уый ма радзырдта, мæйы кæрон та фæсивæд кæй тох кæндзысты Уæрæсейы æмбырдгондмæ бахауыныл.
"25-28 октябры Ульяновскы цæудзæн Уæрæсейы фыццагад, йæ архайджытæ суыдзысты Тадтаты Софья æмæ Роман, стæй ма Дудайты Донна, Гаглойты Диана æмæ Тедеты Аза. Дудайты Донна æмæ Гаглойты Диана ивгъуыд азы ерысты хатдзæгтæм гæсгæ сты Уæрæсейы æмбырдгонды сконды, ныр та сæ ногæй иннæ спортсменты æмрæнхъ хъæуы сæ класс сбæлвырд кæнын", - бафтыдта тренер.
