ЦХИНВАЛ, 4 сен — Sputnik. Уӕрӕсейы адӕмон артист Сергей Безруковы сфӕлдыстадон изӕр Хуссар Ирыстоны уагъд ӕрцӕудзӕн фестиваль "Уазӕгуаты Гергиты Ларисӕмӕ"-йы фӕлгӕтты, фехъусын кодта Sputnik РХИ минӕвар УФ Гасситы Знаур.
Хуссар Ирыстонмӕ фыццаг хатт фӕуазӕг уыдзӕн зындгонд уӕрӕсейаг актер Сергей Безруков. Цхинвалы ККЗ "Чермены"-ы бӕстыхайы 9-ӕм сентябры уагъд ӕрцӕудзӕн актеры сфӕлдыстадон изӕр. Безруков сценӕйыл дӕр ӕмӕ кинонывты дӕр сӕххӕст кодта бирӕ фӕлгонцтӕ, уыдоны ӕхсӕн Владимир Высоцкий, Александр Пушкин, Сергей Есенин ӕмӕ ӕндӕр зындгонд адӕмы фӕлгонцтӕ.
"Уый у хӕрзаудӕн концерт, уагъд цӕуы фестиваль "Уазӕгуаты Гергиты Ларисӕмӕ"-йы фӕлгӕтты Уӕрӕсейы уӕвӕг Хуссар Ирыстоны минӕварады ӕххуысӕй. Гергиты Ларисӕ тынг бирӕ сарӕзта ирон ӕмӕ уӕрӕсейыг культурӕ фӕсарӕнты парахат кӕныны хъуыддаджы", — загъта Гасситы Знаур.
Гергиты Ларисӕ — Уӕрӕсейы, Украинӕйы. Хуссар ӕмӕ Цӕгат Ирыстоны адӕмон артисткӕ. Уый у егъау сфӕлдыстадон гоймаг дунейон вокалон аивады масштабы. Ис ӕм иттӕг хорз музыкалон ӕмӕ организаторон миниуджытӕ. Гергиты Ларисӕ ма у ӕппӕт дунейы зындгонд вокалон концертмейстертӕй сӕ иу, бирӕ ӕхсӕнадӕмон конкурсты директор ӕмӕ жюрийы уӕнг.
2013 азы июны Хуссар Ирыстоны уагъд ӕрцыд фестиваль "Уазӕгуаты Гергиты Ларисӕмӕ", уый фӕлгӕтты Цхинвалы ауагъдӕуыд цалдӕр сывӕллӕтты музыкалон спектаклы ӕмӕ "Мариинаг театры ӕвзонг оперон зарӕггӕнджыты академи"-йы солистты концерт. Академийы аивадон къухдариуӕггӕнӕг у Гергиты Ларисӕ.
