ЦХИНВАЛ, 16 окт — Sputnik. Хуссар Ирыстоны цӕрджыты иумӕйаг сфысты фыццаг бон сфыстуадзджытӕ бабӕрӕг кодтой 850 цӕрӕнуат ӕмӕ 3100 адӕймагӕй фылдӕры, фӕхъусын кодта Sputnik Статуправленийы сӕргълӕууӕг Тыбылты Инал.
Республикӕйы цыппӕрӕмы райдыдта Хуссар Ирыстоны ног историйы цӕрджыты фыццаг иумӕйаг сфыст. Йӕ бындурон хай уагъд цӕудзӕн 15-30 октябры. Сфысты фыццаг хайадисӕг уыд президент Тыбылты Леонид.
"Ӕппӕт республикӕйы сфыстуадзджытӕ райстой бӕрӕггӕнӕнтӕ 850 цӕрӕнуат ӕмӕ 3100 ӕмбӕстагӕй. Уый та у развӕлгъау бӕрӕггӕнӕнты 7,5%", — загъта Тыбылты Инал.
Йӕ ныхӕстӕм гӕсгӕ, сфысты фыццаг бон ацыд активонӕй, сфыстуадзджытыл алы хӕдзары дӕр ӕмбӕлынц узӕлгӕйӕ.
"Куыд Цхинвалы, афтӕ районты цӕрджытӕ дӕр тынг ӕхсызгонӕй ӕмбӕлынц нӕ кусджытыл ӕмӕ ацы ахсджиаг мадзалы исынц активон хайад", — банысан кодта Статуправленийы сӕргълӕууӕг.
Тыбылты Инал ма куыд загъта, афтӕмӕй сфыстуадзӕг хӕдзары куы никӕй баййафы, уӕд ныууадзы йӕ контакттӕ, цӕмӕй йӕм цӕрджытӕ фӕдзурой ӕмӕ ма сӕм иу хатт ӕрбацӕуа.
Бӕстондӕр информаци сфыст уадзыны тыххӕй ссардзыстут Статуправленийы сайтыл.
