ЦХИНВАЛ, 21 окт — Sputnik. Хуссар Ирыстоны цӕрджыты иумӕйаг сфысты ӕхсӕзӕм бонмӕ сфыстуадзджытӕ райстой дырыс бӕрӕггӕнӕнтӕ 25 000-ӕй фылдӕр адӕймагӕй ӕмӕ аст минӕй фылдӕр цӕрӕнуатӕй, фехъусын кодта Sputnik РХИ Статуправленийы сӕргълӕууӕг Тыбылты Инал.
Республикӕйы 15 октябры райдыдта цӕрджыты иумӕйаг сфыст. Йӕ бындурон хай фӕуыдзӕн 30 октябры.
"Ӕхсӕз бонмӕ сфыстуадзджытӕ ӕппӕт республикӕйы райстой дырыс бӕрӕггӕнӕнтӕ 25 000-ӕй фылдӕр ӕмбӕстагӕй ӕмӕ аст минӕй фылдӕр цӕрӕнуатӕй", — загъта Тыбылты Инал.
Уый банысан кодта, зӕгъгӕ ӕртыццӕджы онг Цхинвалы районы сфыстӕуыд 3 150 адӕймаджы, Знауыры районы — 2 514 адӕймаджы, Ленингоры районы — 2 159 адӕймаджы. Иууыл фылдӕр бӕрӕггӕнӕнтӕ сфыстуадзджытӕ райстой Дзауы районы — 3 954 адӕймаджы. 13 000-ӕй фылдӕр цӕрӕджы сфыстой республикӕйы столицӕйы.
Тыбылты Иналы ныхӕстӕм гӕсгӕ, сфыст цӕуы сабыр уавӕры, ӕрвылбон дӕр мадзӕлтты тыххӕй информаци ӕвдыст цӕуы бынӕттон массин информацион фӕрӕзты. Статуправленийы кусджытӕ лӕмбынӕг сӕ хъус дарынц сфыстуадзджыты куыстмӕ.
"Афтӕ ма горӕты ӕмӕ районты кусынц сфыстуадзӕн фадгуытӕ, уырдӕм сӕ бон у ӕмӕ ӕрбацӕуой цӕрджытӕ ӕмӕ бынаты дзуаппытӕ радтой фарстытӕн. Ахӕм фадгуытӕ республикӕйы ӕдӕппӕт ис 143, уыдонӕй 74 — Цхинвалы", — загъта Статуправленийы хистӕр.
Йӕ ныхӕстӕм гӕсгӕ, сфысты тыххӕй развӕлгъау бӕрӕггӕнӕнтӕ парахат ӕрцӕудзысты йӕ бындурон хайы фӕудӕй дыууӕ мӕйы фӕстӕ.
