ЦХИНВАЛ, 14 дек — Sputnik, Плиты Фатимӕ. Дыууын азы дӕргъы сценӕйыл паддзахадон кафты ансамблы сконды, ансамбль "Кафт"-ы аивадон къухдариуӕггӕнӕг, националон дарӕсы дизайнер, зынгӕ ӕхсӕнадон архайӕг — йӕ царды алы этапы дӕр Четион Майя йӕ адӕмӕн бакодта стыр лӕггад ӕмӕ ссис Цхинвалы иууыл зындгонддӕр ӕмӕ уарзондӕр гоймӕгтӕй сӕ иу.
Майя йӕ цард снывонд кодта аивадӕн ӕмӕ дзы алы здӕхӕны дӕр архайы ӕнтыстджынӕй. Цайдагъ кӕны сывӕллӕтты националон кафтыл, фӕстаг ӕзты та йӕ тых радта кафтмӕ ӕвзыгъд фӕсивӕдӕн националон дарӕс хуыйынмӕ.
2011 азы Хуссар Ирыстоны ахуырады министрады дӕлбар скуыста монон-фӕткӕвӕрдон программӕ. Ацы нывӕзт стыр ахъаз фӕцис националон аивад сӕндидзын кӕныны хъуыддаджы. Скъолаты кафты кружоктӕн Четион Майя йӕ хо Неллиимӕ, кӕцы у профессиналон хуыйӕг, бахуыдтой кафты дарӕсы 500 комплектӕй фылдӕр. Республикӕйы раззагон коллективтӕ "Скифтӕ", "Кафт" ӕмӕ "Ирон" ӕхсӕнадӕмон сценӕтӕ басӕттынц Четиты дыууӕ хойы хуыд дарӕсы.
"Дарӕс фаг никуы вӕййы, алкӕцы кафтӕн дӕр хъӕуы йӕхи дарӕс. Джиоты Аряна ма ахуырады министр куы уыд, уӕд сарӕзта стыр хорздзинад ацы программӕйӕ. Бӕргӕ ма куы сфӕлхатт кӕниккой ацы нывӕзт, науӕд та куы фӕзынид ахӕм фӕрӕзджын адӕм, кӕцытӕ балӕггад кӕниккой ирон аивадӕн", — радзырдта Четион.
Кӕд фӕрӕзтӕ ӕмӕ уавӕртӕ фаг нӕй, уӕддӕр Четиты дыууӕ хойы сӕ тыхтӕ нӕ ауӕрдынц ӕмӕ, сӕ бон куыд у, афтӕ архайынц ирон националон аивад сӕндидзын кӕныныл.
"Цӕгат Ирыстоны ӕрмӕст разгӕмттӕ сты иууыл къаддӕрӕй 25 мин сомы. Мах та ӕппӕт комплект бахуыдтам 15 минтыл. Стӕй ӕрмӕст хуыйын зонын фаг нӕу, хъӕуы сахуыр кӕнын нӕ рагфыдӕлты цард, цӕмӕй дарӕс баххӕст кӕнай националон орнаментӕй", — банысан кодта Майя.
Горӕты дыккӕгӕм скъолайы бындурыл уӕвынад кӕны националон кафты ансамбль "Кафт", йӕ аивадон къухдариуӕггӕнӕг — Майя Четион. Сӕдӕ сывӕллоны сӕ арӕхстдзинад ӕвдисынц бынӕттон сценӕтыл, ӕнтыстджынӕй архайынц ӕхсӕнадӕмон фестивалты, фӕлӕ сӕйрагдӕр та уый у, ӕмӕ ӕнустӕм бауарзынц националон кӕфтытӕ.
"Скъолайы фӕуды фӕстӕ сывӕллӕттӕ махӕй ацӕуынц, фӕлӕ уыдонӕй бирӕтӕ сӕ цард сбӕттынц аивадимӕ, цалдӕрӕй баххӕст кодтой паддзахадон ансамбль "Симды" рӕнхъытӕ, аннӕтӕ та ахуыр кӕнынц Уӕрӕсейы уӕлдӕр ахуырадон уагдӕтты аивады хаххыл", — дзуры Четион.
Ныртӕккӕ та къорды кӕстӕр сконд йӕхи цӕттӕ кӕны фестиваль "Казачий круг"-мӕ Мӕскуымӕ.
"Ӕртыккӕгӕм январы Мӕскуыйы уагъд цӕудзӕн мадзал ӕмӕ дзы равдисдзыстӕм "Хӕххон" ӕмӕ "Хонгӕ кафт". Кӕстӕр къордӕн уый уыдзӕн сӕ фыццаг рахызт ӕхсӕнадӕмон ӕмвӕзадмӕ. Ахӕм фестивалтӕй сывӕллӕттӕ ӕрӕздӕхынц ӕндӕртӕй. Иу стыр зындзинад ма вӕййы арӕхстджын фӕсивӕды ӕхсӕн равзарын цалдӕр адӕймаджы фестивалмӕ акӕнынӕн", — загъта аивадон къухдариуӕггӕнӕг.
Фӕстаг ӕзты стыр хъусдард здӕхт цӕуы националон кӕфтытӕм. Ирон адӕм та кӕдфӕндыдӕр сӕрыстыр уыдысты сӕ сӕйраг кафт "Симд"-ӕй. Уымӕ гӕсгӕ, ацы кафтыл рӕзгӕ фӕлтӕрты цайдагъ кӕнынц рӕвдауӕндӕттӕй фӕстӕмӕ. Четион уый растыл нӕ нымайы.
"Симд у академион кафт, рӕвдауӕндоны сабийӕн та уый сусӕгдзинӕдтӕ бамбарын ӕмӕ банкъарынӕн раджы у. Уымӕ гӕсгӕ уал райдайӕны сисын хъӕуы дзыхӕйдзургӕ сфӕлдыстадӕй сюжеттӕ ӕмӕ саразын сӕрмагондӕй "Сывӕллӕтты ирон кӕфтытӕ", — загъта уый.
Четион ма кӕны хӕрзаудӕн куыст дӕр — ӕрӕджы ансамбль "Кафт" ауагъта концерт Алагиры моладзандоны цур стыр аргъуаны арæзтадæн баххуыс кӕныны нысанӕн. Майяйы ныхӕстӕм гӕсгӕ, концерты инициатортæ ссисты сывæллæттæ, кæцытæ улæфыдысты Алагиры моладзандоны цур сывæллæтты реабилитацион центры.
Хӕрзаудӕн концерт ӕрӕмбырд кодта 114 мин сомы ӕмӕ сӕ дыккаг бон фæхæццæ кодтой моладзандонмæ.
Ансамблы аивадон къухдариуӕггӕнӕг бӕллы Ирыстоны адӕмы ӕрвылбонон националон дарӕсы фенын ӕмӕ фаг фӕрӕзтӕ ссарын иууыл чысыл сывӕллӕтты коллективтӕн рӕсугъд националон дарӕс скӕнынӕн.
