ЦХИНВАЛ, 2 фев — Sputnik. Цхинвалы æрæвнæлдтой видеоцæстдарды иумæйаг телекоммуникацион системæ "Æдас горæт" аразынмæ, кæцы æвæрццагæй бандавдзæн горæты цæрджыты æдасдзинад бахъахъхъæныныл, фехъусын кодта дыццæджы Sputnik Хуссар Ирыстоны Мидхъуыддæгты министрады (МХМ) пресс-службæйы минæвар Чехойты Александр.
Йæ ныхæстæм гæсгæ, проекты реализацийы фæнд сæвзæрд цалдæр азы размæ, фæлæ йæ балхæнын æмæ сæвæрыны реалон фадæттæ фæзынд æрмæстдæр ивгъуыд азы кæрон.
"Нæ горæты æдасдзинад хъахъхъæд нæ цæуы æмбæлон уагæй, кæд барадхъахъхъæнæн органтæ исынц мадзæлттæ, уæддæр. Уымæн уæлдай æвдисæн сты фæстаг рæстæджы æрцæугæ резонансон фæндагон-транспортон цаутæ. Системæ "Æдас горæт"-ы нысан у уавæр фæхуыздæр кæнын. Уый æнтыстджынæй кусы Уæрæсейы бирæ горæтты. Ацы бонты республикæмæ æрцыдысты уæрæсейаг специалисттæ, кæцытæ райдыдтой аразын ахæм системæ нæ горæты", — загъта мидхъуыддæгты министрады минæвар.
Уый ма банысан кодта, стационарон видеокамерæтæ кæй æрцæудзысты æвæрд Цхинвалы иууыл цырынгонд змæлдимæ уынгты, скъолатæ æмæ сабидæттæм æввахс.
"Системæйы фæрцы хъусдард здæхт уыдзæн æрмæст горæты фæндагон змæлдмæ нæ, фæлæ мадзæлттæм дæр, фæлладуадзæн зонæтæм. Системæ здæхт уыдзæн æрмæст горæты фæткæвæрд бахъахъхъæнынмæ нæ, фæлæ ма уый фæрцы рæстæгыл бæрæг цӕудзысты алыгъуызон уӕлвæткон уавæртæ, зæгъæм, зынгсирвæзттæ", — бафиппайдта Чехойты Александр.
Йæ ныхæстæм гæсгæ, видеокамерæтæй информаци лæвæрд цæудзæн иумæйаг центрмæ, æмæ ацы бæрæггæнæнтæй бахъуыды рæстæджы фадат уыдзæн спайда кæнын паддзахадон структурæтæн — Автоинспекци, Мидхъуыддæгты министрад, Уæлвæткон уавæрты министрадæн.
Уæрæсейы Федерацийы ахæм системæтæ лæггад кæнынц горæты администрациты цур сæрмагонд службæтæн. Нырма бæрæг нæу, кæд фæуыдзысты системæ монтажгæнæн куыстытæ, специалисттæ нырма айгæрдынц кабелтæ. МХМ-ы минæвар куыд банысан кодта, афтæмæй системæйы куысты стыр нысаниуæг ис уынгты хорз рухслæвæрдæн, уымæ гæсгæ специалисттæ æмгуыст кæнынц горæты администрациимæ.
