ЦХИНВАЛ, 1 мар — Sputnik, Плиты Фатимӕ. Хуссар Ирыстоны кафт ӕмӕ зарды паддзахадон ансамбль "Симд" раивта йӕ къухдариуӕгад. "Симд"-ӕн ныр ис ног аивадон къухдариуӕггӕнӕг ӕмӕ директор, сӕйраг балетмейстер ӕмӕ ӕвӕрӕг — балетмейстер.
Фӕстаг азы дӕргъы республикӕйы сӕйраг ансамблы коллектив ӕвзӕрста зын рӕстӕджытӕ. Коллектив кӕрӕдзи мидӕг ссис, кӕцыдӕрты дзы иу къухдариуӕггӕнӕг нӕ хъуыд, кӕцыдӕрты — иннӕ. Кафджытӕ дӕр фесты кӕрӕдзимӕ, сӕ дон нал рӕсугъд кодта культурӕйы министрадимӕ дӕр. Ныр къорды разамынад ӕрцыд ивд.
Иу мӕйы размӕ ансамблы аивадон къухдариуӕггӕнӕг ӕмӕ директорӕй нысан ӕрцыд Гаглойты Ростик, сӕйраг балетмейстер ӕмӕ ӕвӕрӕг-балетмейстеры бынӕттӕм та ӕхруыдтой Симды раздӕры артистты, Мӕскуыйы хореографийы университеты нымад рауагъдонтӕ Чилӕхсаты Георгий ӕмӕ Коцты Сергейы. Фӕлӕ уыдон дӕр ӕххӕстӕй нӕма зонынц, цы хауы сӕ хӕстӕм, цы та нӕ, уыдӕттӕ.
Сӕйраг балетмейстер Чилӕхсаты Георгий раздӕр кафыд Симды сконды. Уый фӕстӕ ацыд ахуырмӕ Мӕскуымӕ, цыран райста балетмейстеры дӕсныйад Уӕрӕсейы театралон аивады институты. Уый фӕстӕ ӕрӕздӕхт Цхинвалмӕ ӕмӕ райдыдта кусын скъолайы кары сабитимӕ. Фӕндзӕм скъолайы аивадон къорд йӕ къухдариуӕгадӕй дыууӕ аз фӕд-фӕдыл ӕмбулы республикӕйы хореографийы фестивалтӕ. Фӕлӕ ног сӕйраг балетмейстер Симды куысты та ӕмбӕлы бирӕ цӕлхдуртыл.
"Иу мӕй дӕргъы кусын ӕмӕ мын нырма саразын ницы бантыст. Фӕнды мӕ мӕ дипломон куыст Симды къордимӕ сӕвӕрын. Уый уыдзӕн Нарты кадджыты бындурыл арӕзт театралон равдыст. Хъавӕм сӕвӕрын ног "Симд" ӕмӕ "Рог кафт", — дзуры Чилӕхсаты Георгий.
Георгий ӕвӕрӕг-балетмейстер Коцты Сергейимӕ ног нывӕзтыл кусынц эффективон тандемы, фӕлӕ сӕ къухы уадиссаг ницыма бафтыд.
"Симды коллективы ис лӕмӕгъ дисциплина, нӕй дзы фаг профессионалон кафджытӕ дӕр. Ансамблы хъӕуы глобалон рацарæзт. Цӕмӕй ног кафт сӕвӕрон, уый тыххӕй мӕ хъӕуы ног артисттӕ уӕлӕмхасӕй. Дзӕуджыхъӕуӕй ничи цӕуы ардӕм, бынаты та цы арӕхстджын фӕсивӕд ис, уыдон нырма паддзахадон ансамблы кафджыты кары нӕ бацыдысты", — загъта Коцты Сергей.
Ӕвзонг специалисттӕ ныридӕгӕн кусынц "Симды" зӕронд репертуары кӕфтыты хуыздӕр бацӕттӕ кӕныныл.
Фӕлӕ ансамблы аивадон къухдариуӕггӕнӕг ӕмӕ директор Гаглойты Ростик куыд радзырдта Sputnik, афтӕмӕй ӕввахс рӕстӕджы репертуары дӕр фӕзындзӕн ивындзинӕдтӕ.
"Нӕ разы сӕвӕрдтам нысан — "Симд"-ы репертуары цы авд кафт ис, уыдон хорз бацӕттӕ кӕнын фыццаг рады, стӕй та рахиздзыстӕм ног кӕфтытӕ ‘вӕрынмӕ. Фӕнды нӕ фыццаг концерт раттын 17 марты. Мӕйы кӕронмӕ та хъуамӕ нӕ репертуар баххӕст кӕнӕм ногӕвӕрд кафтӕй. Фидӕны, нӕ фӕндмӕ гӕсгӕ, Симд хъуамӕ ӕрвыл мӕй дӕр дӕтта дыууӕ концерты", — загъта аивадон къухдариуӕггӕнӕг.
