ЦХИНВАЛ, 29 мар — Sputnik. Хуссар Ирыстоны Хъахъхъæнынады министрады æфсæддонтӕ æмæ уæрæсейаг æфсæддон базæйы службæгæнджытæ равдыстой хорз фæстиуджытæ цæгатирыстойнаг полигон "Тарскæ"-йы иумæйаг ахуырты рæстæджы, фехъусын кодтой Sputnik республикæйы хъахъхъæнынады ведомствӕйы.
Ивгъуыд къуыри "Тарскæ"-йы полигоны уагъд æрцыдысты РХИ гарзджын тыхты æмæ 4-æм уæрæсейаг æфсæддон базæйы реактивон-артиллерион дæлхæйтты сæрмагонд сконды нывæзтон ахуыртæ.
"Службæгæнджытæ бакуыстой æфсæддон æхстыл. Бафидар кодтой, раздæр специалон цæттæдзинады фæдыл ахуырты рæстæджы цы зонындзинæдтæ райстой, уыдон. Равдыстой хорз бæрæггæнæнтæ æмæ æфсæддон хæслæвæрдтæ æххæст кæныны рæстæджы бæрзонд æмгуыстад", — фехъусын кодта пресс-службæйы минæвар.
Хъахъхъæнынады министрады минæвар банысан кодта, ахуырты рæстæджы спайдагонд кæй æрцыд нырыккон æфсæддон машинæтæй, цæй рæстæджы службæгæнджытæ равдыстой бæрзонд цæттæдзинад.
Ахуырты къухдариуæггæнджытæ, Хуссар Ирыстоны гарзджын тыхты артиллерион дæлхæйтты æмæ уæрæсейаг æфсæддон базæйы командиртæ райгондæй баззадысты ахуырты фæстиуджытæй.
Пресс-службæйы ма бафтыдтой, ахæм иумæйаг быдырон ахуыртæ уагъд кæй цæуынц регулярон æгъдауæй.
