ЦХИНВАЛ, 8 апр — Sputnik. Цхинвалы районы адӕмон театр Цӕгат Кавказы адӕмон театрты фестиваль "Театральная весна"-йӕ ӕрӕздӕхт ӕртӕ призимӕ. Труппӕ фестивалы равдыста спектакль "Файнустытӕ".
Фестивалы жюрийы фӕндонмӕ гӕсгӕ, адӕмон театры труппӕ райста бӕрзонд хорзӕх "Театралон традицитӕ бахъахъхъӕныны" номинацийы, спектаклы режиссер, РХИ адӕмон артист Уанеты Ӕхсар та ссис номинаци "Хуыздӕр режиссура"-йы уӕлахидзау. Артисткӕ Сиукъаты Оксана та рамбылдта номинаци "Дебют"-ы.
"Фестивальмӕ куы цӕттӕ кодтам, уӕд ӕнӕнхъӕлӕджы фӕрынчын ис нӕ актрисӕтӕй иу ӕмӕ йӕ баивтам Сиукъаты Оксанайӕ. Уый канд иттӕг хорз не ‘сӕххӕст кодта йӕ фӕлгонц, фӕлӕ ма райста хорзӕх "Дебют"-ы номинацийы дӕр", — радзырдта Sputnik театры аивадон къухдариуӕгӕнӕг Уанеты Ӕхсар.
Йӕ ныхӕстӕм гӕсгӕ, адӕмон театры труппӕйы архайд афтӕ арф тӕлмӕнтӕ ныууагъта фестивалы архайджытыл, ӕмӕ сӕ фӕхуыдтой радон фестивальмӕ Анапӕмӕ дӕр.
Цӕгат Кавказы адӕмон театрты фестиваль "Театральная весна" цыд Дзӕуджыхъӕуы "Ирон театры" сценӕйыл. Цхинвалы районы адӕмон театр бавдыста фестивальмӕ Нартыхты Григолы уацмысмӕ гӕсгӕ ӕвӕрд комеди "Файнустытӕ". Комедийы архайынц артисттӕ — Джыгкайты Эльбрус, Козаты Сӕлимӕт, Джыгкайты Тузар, Цоциты Николай, Сиукъаты Оксана, Багаты Георгий ӕмӕ ӕндӕртӕ.
