ЦХИНВАЛ, 11 апр — Sputnik. Æнæниздзинад хъахъхъæны æмæ социалон политикæйы фæдыл парламентон комитет бакуыста закъоныл, кæцы сæвæрдзæн тобæ æхсæнадон бынæтты тамако дымыныл. Проект куы æрæмдзых кæной Хуссар Ирыстоны хицауадимæ, уæд рахаст æрцæудзæн депутатты уынаффæмæ, фехъусын кодтой парламенты пресс-службæйы.
Раздæр Хуссар Ирыстоны парламент райста республикæйы территорийыл æууилгæ тамако "снюс", "насвай" æмæ æндæр ӕнгӕс буарадты æрбаласт, æлхæнын, уæй кæнын æмæ спайда кæныныл тобæ сæвæрыны фæдыл закъон.
Æнæниздзинад хъахъхъæныны комитеты сæргълæууæг Къозонты Аланы ныхæстæм гæсгæ, ацы закъоны нысан у æмбæстæгты тамакойы фæздæджы зианхæссæг æндæвдадæй бахизын.
"Адæймаджы буар тамокойы æндæвдадæй бахизыны тыххæй закъон тобæ æвæры тамако дымыныл сывæллæтты фæзуæтты, хицауад цы бæстыхæйттæ ахсы, социалон службæты хатæнты, æхсæнадон транспорты, скъолаты территорийыл æмæ æндæр бынæтты", — загъта комитеты разамонæг.
Закъон райсыны фæстæ тамако дымыны бар уыдзæн æрмæстдæр вентиляцийы системæимæ сæрмагонд хатæнты, кæнæ гом арвы бын.
