ЦХИНВАЛ, 18 апр — Sputnik. Хуссар Ирыстоны 20 апрелæй фæкъаддæр уыдзæн æртаджы аргъ, фехъусын кодта къуырисæры Sputnik РХИ экономикон райрæзты министр Зæгъойты Вильям.
"Президенты фæдзæхстмæ гæсгæ, экономикæйы министрад баныхас кодта компани "Роснефть"-имæ. Бадзырды рæстæджы аскъуыддзаг кодтой бензин æмæ дизелон æртаджы аргъ 1 сомы бæрц фæкъаддæр кæнын", — загъта зæгъойты Вильям.
Уый банысан кодта, "Югоосетнефтепродукт"-ы æртагкæнæн станцты дыууæ боны фæстæ АИ-92 маркæ бензины литры аргъ кæй уыдзæн 32 сомы, дизелон æртаг та 30 сомы.
"Нæ республикæ нефтепродукттæй ифтонг кæны уæрæсейаг компани "Роснефть", уымæ гæсгæ фидарæй зæгъæн ис æртаджы гъæд хорз кæй у", — бафтыдта Зæгъойты Вильям.
Хъæутæн æвæрд æрцыд сæрмагонд аргъ, уымæ гæсгæ хъæутæн АИ-92 литр уæй кæндзысты 30,5 сомæй, дизелон æртаг та 29,5 сомæй.
"Ис зынвадат регионтæ, кæцытæ æнцон нæу æртагæй ифтонг кæнын, уымæ гæсгæ уыцы фæлхасгæнджытæн фæкъаддæр кодтам аргъ", — радзырдта Зæгъойты Вильям.
Уый банысан кодта, рæстæджы цыдимæ кæй ивдзæн æртаджы аргъ дæр, фæлæ уал æввахс мæй аргъ аивынæн ницы аххосæг ис.
