ЦХИНВАЛ, 29 апр — Sputnik, Босыкты Наталья. Гуырдзиаг агрессорты амæттæгтæн нывонд фыдохы митинг уагъд æрцыд Ленингоры районы Цъинагары хъæуы.
Æрвылаздæр ацы бон æмхъæуккæгтæ, хиуæттæ æмæ хæстæджытæ æрæмбырд вæййынц фæмардуæвджыты цырты цур сæ рухс нæмттæ ссарынæн.
Ацы аз хъæумæ æрцыд республикæйы сæргълæууæг Тыбылты Леонид парламенты минæвæрттæ, министрæдтæ æмæ уагдæтты къухдариуæггæнджытимæ, афтæ ма æхсæнадон организациты уæнгтимæ. Уыдон ссардтой агрессийы амæттæгты рухс нæмттæ æмæ сæвæрдтой дидинтæ мемориалмæ.
Президент æрсидт фæмардуæвджыты хæстæджытæм, афтæ ма Цъинагары цæрджытæм, кæцытæ æрбамбырд сты администрацийы бæстыхайы раз.
"Махæй никуы уыдзæн рох ацы æбуалгъ трагеди, кæцы ахаста ирон лæппуты цард. Мах æрæмбырд стæм, цæмæй ссарæм уыцы æрыгон лæппуты рухс ном, кæцытæ фæмард сты, сæ бартæ æмæ сæ раттæг адæмы бартæ хъахъхъæнгæйæ", — загъта Тыбылты Леонид.
Уый банысан кодта, республикæйы къухдариуæгад цæттæ кæй у хъæуы цæрджытæн æппæт æнæмæнгхъæуæг æххуыс бакæнынмӕ.
Ленингоры районы территорийыл ницы хæстон архæйдтытæ цыд нæдæр 90-æм æзты, нæдæр 2008 азы, фæлæ, уымæ æнæкæсгæйæ, ам гуырдзиаг-ирон конфликты рæстæджы фæмардуæвджыты æмæ æбæрæгæй фесæфæгты иумæйаг нымæц у 23 адæймаджы.
