ЦХИНВАЛ, 29 апр — Sputnik, Босыкты Наталья. Хуссары Иры фæсивæды инициативон къорд фæнд кæны мобилон бастдзинады оператор "Остелеком"-ы зынаргъ интернет æмæ бастдзинады лæггæдты ныхмæ къухфысттæ æрæмбырд кæнын.
Къухфысттæ æмбырдгæнæн листовкæты ис æрмæстддæр дыууæ фарсты — лæггæдты гъæд æмæ интернет æмæ бастдзинады лæггæдты æргъты тыххæй, афтæ ма РХИ-мæ мобилон бастдзинады æндæр оператор æрхонын.
"Къухфысттæ æрæмбырд кæныны фæдыл фембæлд уагъд æрцæудзæн Цхинвалы центры, уазæгдон "Ирыстон"-ы цур майрæмбоны, 18:00 сахатыл. "Остелеком"-ы куыст æмæ интернет æмæ бастдзинады лæггæдтæй райгонд чи нæу, уыдонæй алкæмæн дæр фадат ис æрбацæуын æмæ йæ къух æрфыссын листовкæйыл", — фехъусын кодта Sputnik акцийы организатортæй иу.
Йæ ныхæстæм гæсгæ, республикæйы цæрджытæ æнхъæлмæ кастысты компанийы куыст фæхуыздæр кæнынмæ бирæ æзты дæргъы, фæлæ бафæлладысты бæрзонд æргътæ æмæ интернеты æвзæр гъæд быхсынæй.
"Компани "Остелеком"-ы минæвæрттæ фидарæй дзырдтой, кæй бахæсдзысты ивындзынæдтæ бастдзинад æмæ интернеты гъæд æмæ æргътæм 2016 азы дыккаг кварталæй, фæлæ уавæр йæ бынатæй нæ фенкъуыст. Мах бафæлладыстæм нæ дзыхтыл хæцын æмæ быхсын", — загъта акцийы хайадисæг.
Протестон акци ма уагъд цæуы социалон хызæгты дæр. ВКонтакте æмæ Инстаграммæй пайдагæнджытæ парахат кæнынц хэштег #молодежьРЮОпротивМегафона.
Интернет лæггæдты æргътæ базоныны нысанæн Sputnik уацхæссæг абарста "Остелеком" æмæ компани "Мегафон Москва"-йы интернет-опциты æргътæ.
Интернет опци "LTE XL"-мæ гæсгæ 30 гб трафикæн РХИ-ы цæрæг хъуамæ бафида 2100 сомы. Мæскуыйы ахæм опци интернет-пайдагæнæгæн 36 гб трафик слæудзæн 899 сомы.
ЗАО "Остелеком" — фыццаг мобилон бастдзинады оператор РХИ-ы территорийыл. Компани арæзт æрцыд 2004 азы. 2010 азæй "Остелеком" ифтонг кæны бастдзинады лæггæдтæй мобилон бастдзинады фыццаг уæрæсейаг оператор бренд "Мегафон"-ы бын.
