ЦХИНВАЛ, 3 мая — Sputnik. Паддзахадон ӕдасдзинады комитеты ӕмӕ Мидхъуыддӕгты министрады наркотикон буарадты ӕнӕзакононӕй парахат кӕныны ныхмӕ хайады кусджытӕ не рбауагътой республикӕйы территоримӕ препарат "Лирика", фехъусын кодтой дыццӕджы Sputnik ПӔК пресс-службӕйы.
Ивгъуыд азы июлы мӕйы республиӕйы парламент райста закон, кӕцы тобӕ сӕвӕрдта препарат "Лирика"-йы ӕнӕзаконон ӕрбаласт, реализаци ӕмӕ пайдакӕнынадыл. Депутаттӕ ахӕм уынаффӕ райстой уымӕн, ӕмӕ ацы препаратӕй арӕх ӕнӕзаконӕй кӕй пайда кодтой фӕсивӕд, уый та ӕнӕниздзинадӕн хӕссы стыр зиан.
"Оперативон-фӕдагурӕн мадзӕлтты рӕстӕджы 1 майы ӕдасдзинады комитет ӕмӕ мидхъуыддӕгты министрады кусджытӕ байстой Хуссар Ирыстоны тобӕгонд препараты егъау парти. "Лирика" ссардӕуыд арӕнгӕрон уадзӕн пункт "Рукъ"-ы, Цӕгат Ирӕй цы Honda CR-V машинӕ рацӕйцыд, уым", — радзырдтой пресс-службӕйы.
Фӕткхалӕг фӕнд кодта Хуссар Ирыстоны территоримӕ ӕрбаласын препараты 1378 капсулӕйы, сӕ аргъ уыд 500 000 мин сомӕй фылдӕр. Оперативон мадзӕлтты рӕстӕджы куыд рабӕрӕг, афтӕмӕй медицинон препараты парти ласта Хуссар Ирыстоны ӕмбӕстаг, цхинвайлаг 48-аздзыд сылгоймаг.
Ныртӕккӕ ӕрмӕджытӕ ӕрвыст ӕрцыдысты тӕрхондонмӕ.
