ЦХИНВАЛ, 17 май — Sputnik. Цхинвалы схорзӕхджын кодтой ирон ӕвзагӕй тоталон диктанты хайадисджыты.
Цхинвалы 11 майы ныффыстой глобалон диктант. Мадзалы хайад райстой дӕсгай адӕймӕгтӕ — ахуыргӕнджытӕ, скъоладзаутӕ, хицауады кусджытӕ, студенттӕ ӕмӕ журналисттӕ. Се ‘хсӕн уыд канд ирӕттӕ нӕ, фӕлӕ ма ӕндӕр нациты минӕвӕрттӕ дӕр.
"Мадӕлон ӕвзагӕй сӕ зонындзинӕдтӕ бафӕлварын кӕй фӕндыд, уыдонӕй дыууӕйӕ — Анахарсисы номыл библиотекӕйы кусӕг ӕмӕ гимнази "Альбионы" ахуырдзау сӕ хӕслӕвӕрд ныффыстой нывыл ӕмӕ райстой фыццаг къӕпхӕны дипломтӕ", — радзырдта Sputnik ахуырады министрады пресс-секретарь Плиты Яна.
Ирон ӕвзаджы грамматикӕйӕ сӕ зонындзинӕдтӕ фӕлвӕрдтой Хъайтыхты Азӕмӕты очерк "Хӕдзары хицау"-уы скъуыддзагӕй. Бакаст текст гимнази "Альбион"-ы ирон ӕвзаг ӕмӕ литературӕйы ахуыргӕнӕг Зассеты Зара.
Мадзал арӕзт ӕрцыд республикӕйы ахуырады министрады хъӕппӕрисӕй ирон ӕвзаджы боны цытӕн, кӕцы нысан цӕуы 15 майы.
