ЦХИНВАЛ, 15 июн — Sputnik. Хуссар Ирыстоны иунæг уæлдæр ахуырадон уагдон фыццæгæм июлæй райдайдзӕн абитуриентты документтӕ исын. Рауагъдонтӕн ис фадат равзарын 20 дæсниадæй фылдæрæй боны æмæ фæсаууонмæ хайадмæ, дзырдæуы хуссарирыстойнаг паддзахадон университеты ректораты хъусинаджы.
Фарон ХИПУ-йы студенттæ ссисты 550 адæймаджы. Уыдонæй боны хайад равзæрстой 200 æввахс. Ацы аз Хуссар Ирыстоны скъолатæ каст фесты 489 рауагъдоны. Уæрæсейаг уæлдæр ахуыргæнæндæттæм ахуырмæ бацыд 144 абитуриенты.
"Боны хайадмæ ахуырмæ чи цæуы, уыдонæн ис фадат равзарын ахæм факультеттæй, куыд биологи æмæ хими, журналистикæ, фæсарæйнаг æвзæгтæ, истори, математикæ æмæ информатикæ, ирон æвзаг æмæ литературæ, уырыссаг æвзаг æмæ литературæ, педагогикæ æмæ райдиан ахуырады методикæ, психологи, сæудæджерадон æмæ æмбæстагон арæзтад, экономикæ æмæ юриспруденци", — хъусын кæны ректорат.
Фæсаууонмæ хайады та ис равзарæн ахæм дæсниæдтæй, куыд биологи, скъолаагъоммæ педагогикæ æмæ психологи, ирон æвзаг æмæ литературæ, уырыссаг æвзаг æмæ литературæ, физикон культурæ, педагогикæ æмæ райдиан ахуырады методикæ.
Фидгæ бындурыл кусдзысты Паддзахадон муниципалон управленийы фæсаууонмæ хайадтæ дæр, финанстæ æмæ кредит, истори, æхсæнадæмон ахастытæ, авомобилтæ æмæ автомобилон хæдзарад, сæудæджерадон æмæ æмбæстагон арæзтад, фармаци, юриспруденци æмæ психологи.
Равзаргæ дæсниадмæ æнæкæсгæйæ, абитуриенттæ иууылдæр хъуамæ раттой бахыгъд ирон æвзагæй.
Иттæг хорз нысæнттимæ скъола каст чи фæцис, уыдон ратдзысты æрмæстдæр иу фæлварæн.
Документты райст адарддæр уыдзæн 15 июлмæ. Фидгæ бындурыл фæсаууонмæ хайадмæ та — 20 июлмæ.
