ЦХИНВАЛ, 24 июн — Sputnik, Козаты Дианæ. Хуссар Ирыстоны столицæйы хицæуттæ мæйы æмгъуыдмæ хъуамæ сбæлвырд кæной, цы объекттæ арæзт цæудзысты Цхинвалы цæгатгæрон, уыдон. Мэрияйы æркастмæ бавдыстæуыд 12 проектæй фылдæр, кæцыты раразмæ кодтой бынæттон амалиуæггæнджытæ, фехъусын кодтой мэрияйы пресс-службæйы.
Бирæ рæстæг микрорайон "Хурзæрин"-ы онг территори хаудта Цхинвалы районмæ. Æрмæст 2014 азы майы, парламент æмбæлон закъон куы райста, уый фæстæ Цхинвалы территори фæуæрæхдæр цалдæр километры бæрц цæгатырдæм.
Ацы территорийыл ма раздæр арæзт æрцыдысты æртæ микрорайоны æмæ цалдæр социалон объекты — ленкгæнæн бассейн, паддзахадон ансамблы бæстыхай, автосервистæ æмæ æртагкæнæн станцтæ, кафе. Ног объекттæ арæзт цæуынц абон дæр, фæлæ ныры онг бæрæг нæма у, уыдон дзуапп дæтдзысты горæты иумæйаг архитектурæйæн æви сæм æнхъæлмæ кæсы рацарæзт.
Горæты администрацийы фехъусын кодтой, ныры онг кæй нæма радтой иу зæххы фадыг дæр бассейн "Дельфин"-æй "Хурзæрин"-ы онг.
"Фæлæ, уымæ æнæкæсгæйæ, уым ис æрæмбондгонд фадгуытæ, цæуы сæ цавæрдæр арæзтад. Хъуыддаг уый мидæг ис, æмæ цалынмæ ацы территоритæ Цхинвалы скондмæ нæ бацыдысты, уæдмæ
Цхинвалы районы къухдариуæгад цалдæр фадыджы радта республикæйы цæрджытæн, кæцытæ сæ райдыдтой арæзтадон куыстытæ кæнæ та сæ æрæмбонд кодтой", — загъта мэр Æлборты Алан.
Йæ ныхæстæм гæсгæ, алы хъуыддаг дæр горæты хицæуттæ æвзардзысты хицæнæй. Уыимæ иумæ арæзт объекттæ ничи хъавы пырх кæнын, кæд æмæ уыдон дзуапп дæттынц горæтарæзтадон нывæзты домæнтæн. Фæлæ кæд бахъæуа, уæд горæты администраци æрдомдзæн барадон базæйы фæлгæтты рацаразын иу кæнæ иннæ объект.
"Цхинвалы цæгатгæрон алыгъуызон объекттæ саразыны хъæппæрис раразмæ кодтой бирæ бынæттон инвестортæ. Азы дæргъы потенциалон аразджытæн уыд мэриямæ проекттæ бавдисыны фадат. Равзæрст уыд карз, уымæн æмæ алы объект дæр хъуамæ дзуапп дæтта генералон нывæзтмæ гæсгæ иумæйаг стилæн", — банысан кодта Æлборты Алан.
Уый бафтыдта, хæццæ арæзтæдты рæстæг кæй баззад фæстейæ, горæтмæ бацæуæн та у столицæйы æмæ æппæт республикæйы цæсгом, уымæ гæсгæ ацы территорийы хæрзарæзтæн ис принципиалон нысаниуæг.
Ацы проекттæ райдианы хъуамæ сахуыр кæна сæрмагонд горæтарæзтадон совет, уыдон ма хъуамæ æрæмдзых кæной республикон хицауадимæ. Уый фæстæ, мэрияйы куыд банысан кодтой, афтæмæй дзурæн уыдзæн амалиуæггæнджитимæ. Ноджы ма иу домæн суинаг проекттæм — æнæмæнгхъæуæг проектон-сметæйон документаци.
Æлборты Аланы ныхæстæм гæсгæ, инвестортæ бавдыстой бирæ оригиналон проекттæ, цæй фæдыл æлхынцъон скъуыддзаг райсдзысты мæйы æмгъуыдмæ.
"Инвестортæ æрмæст аив къамтæ не ‘рбахæссынц, фæлæ арæзтады конкретон нывæзттæ, уый та у тынг ахсджиаг. Инвестортæн та зæххы фадгуытæ раттыны размæ лæвæрд æрцæудзæн документ, кæцымæ гæсгæ кæд иу азмæ амалиуæггæнæг ницы куыстытæ сæххæст кæна ацы фадыгыл, уæд ӕй горæтарæзтадон совет ратдзæн арендæйы æндæр адæймагæн", — бафиппайдта мэр.
Республикæйы цæрджытæй раздæр ацы территорийыл кæмæн уыд хæдзæрттæ, уыдонæн та радтой æндæр фадгуытæ, кæцытæ адих кæныныл ныридæгæн кусынц горæты хицæуттæ.
Ног фадгуыты хицæуттæ ныридæгæн ссисты 70 æмбæстагæй фылдæр. Фадгуытæ фæкъаддæр сты — 0,25 гектары бæсты 0,1. Мэрияйы бамбарын кодтой, уый баст кæй у уыимæ æмæ горæты мидӕг ацы фæзуат хъуамæ ма уа 0,06 гектарæй фылдæр, фæлæ мэрия сарæзта цӕрджыты къух æмæ сын фæфылдæр кодта сæ фадгуыты фæзуат.
